Buh natna tuartuten an buh enkawl zui tawh lo

Khawzawl district chhunga Sialhawk khuaa loneituten buh natna chikhat ‘blast’ leh pangang puang vanga harsatna an tawh avangin chhungkaw tam takin an buh an enkawl chhunzawm lo tih Sialhawk VCP Lalremchhunga chuan a sawi.
Sialkhawk khuaa loneitute harsatna enfiah hian a hmunah Khawzawl District assistant agriculture officer Hmangaihthangi chu a kal tawh a, pangang thahna hlo leh buh thatna tur (vitamin) semin a hmunah an kap nghal. Hetianga enkawl ni mah se, buh nantna leh pangangin a ei nasat tawh avangin chhungkaw tam zawk chuan an buh an enkawl chhunzawm tawh lo tih Sialhawk VCP chuan The Aizawl Post a hrilh.
Chhungkaw thenkhat chuan an buh hmunah thlai chingin buh thatna tur hlo hrang hrang hman aia an thlan zawk thu VCP hian a sawi a. Heng an harsatna tawh chungchangah hian sawrkar atanga zangnadawmna awm thei hrang hrangte beiseiin hma an la dawn tih a sawi bawk.