Mizoramin buha intodelh theihna tur hmun a neih avangin chumi tur chuan hma an la mek zel tih Agriculture minister chuan a sawi a. An sawrkar hnu ah sawrkar hmalakna in buh leh thlai dang chin theihna turin leilet hectare 484-a zau laih belh a ni tawh tih a sawi.
Agricultur minister C Lalrinsanga chuan Kolasib leh Mamit district-ah leilet tam tak a awm tih sawiin, chu’ng leilet tamzawka buh tharte chu hnamdang enkawl a nih avangin Mizoram zema lut loin Silchar lamah phurh thlak vek zel a ni a. Hei hi tireh a, Mizorama kan thar buh hi keimahni vekin kan ei theihna tur leh leilet siamtuten hlawkna an tel theihna tur an ruahman tih a sawi.
Heng leilet hi kum khat chhungin hman tangkai loha a awm rei thin avangin tuna ruahmannaah chuan kum tluana hman tangkai dan tur duan a ni tih a sawi. Zophai Cluster leh Saihapui ‘V’ Cluster siamin farmer producer organization (FPO) din a ni anga, FPO din tur hian survey neih mek a ni tih a sawi. Loneitu intelkhawmte hian buh, vaimim leh thlasik thlai thar thei turin an ruahman tih sawiin, hetiang hian Serchhip Mat Zawlpui Zau leh Lunglei Nghasih Cluster-ah pawh bul tan tum a ni tih a sawi.
Mizoram buhthar a tam zual theih nan Khawrihnim (Mamit district), Chhungte leh Samthang (Champhai district), Hualtu leh Sialsir (Serchhip district), Chawngtlai, Chhawrtui, Lungchhuan, Suangkuang leh Thingdawl khua huamchhungah permanent farming system kalpui nan terrace zau tak tak, FOCUS fund hmanga laih a ni tih a sawi.
Heng terrace-ah hian thlai thlan bik – fur zikhlum, tomato leh thlai dangte chin niin, tharchhuah tipung turin bio-fertilizer hman tum a ni tih a sawi. Tlangram lo neih dan thar bultanna atana hman tum a nih thu sawiin, “Chherchhuan thum anga kalpuiin, a chhuan hnuai berah tin khat hmun aia zim lo, leh a chherchhuan laitaah sum chang thlai – Dragon fruit emaw nimbu emaw leh thlai dang remchang chingin, a chherchhuan thumna, a lu ber chu ngawa siamin sum chang thei thingkung, theihai, lamkhuang, butterfruit, zawngtah, leh thlai remchang dang phuna ruahmanna kalpui tum a ni,” a ti.
-- Advertisement --
Agriculture minister sawi thenkhat:
# Thingdawl Agriculture Farm-ah Aeroponic hmanga alu chi tihpun tuma hma lak mek a ni a. He hmalakna hi a hlawhtlin chuan, scientist te beisei danin, Mizoram chu alu chi siamnaah hmarchhak mamawh phuhru tura beisei an ni.
# Technology thar, OP-12 Bio-Fertilizer chu Neihbawih Sihphirhah siamchhuah leh tihpun a ni a. District hrang hranga loneitute hman turin enchhin tawh a ni.
# Chemical tur hlauhawm chu thlai eichhetu rannungte ven nana hmang loin, rannung vek hmanga thlai eichhetu beihletna hmanrua vulh punna tur, Biological Control Laboratory chu Lengpuiah sak mek a ni.