Buhfaiah eirukna a awm lo – B Lalchhanzova

Supply department hnuaia buhfai supply ah eirukna awm ang leh amah pawhin dawng ve anga inpuhna chu a dik lo tih minister B Lalchhanzova chuan a sawi a, eirukna a awm lohna turin uluk takin an vil reng zawk tih a sawi.
AMC inthlanpui atana an party-in street campaign an neihah ZPM adviser B Lalchhanzova chuan, buhfai phurh danah Supply minister-in eiru teuh ni anga puhna a awm tih a sawi a. Supply kudam awmna Muanna Veng chu buhfai thlenkhawmna a ni a, mi pakhatin quintal 100 thlen dawn ta se, quintal 100 a rawn thlen loh chuan Bill a siam theih loh tih a sawi. Chutihlaiin eirukna hi awm tak tak ni dawn ta se, quintal 100 rawn thlen si loa quintal 80 thlentu kha quintal 100 thlen angin receipt lo pe ta se, chutiang chu eirukna a ni, tiin, chutiang erawh vawiin thlengin an la hmu lo tih a sawi.
“Buhfai rawn phur tur order kan pek leh buhfai lo thleng a inmil em, tih leh, mipui hnena buhfai kan sem zawng zawng a inmil em, tih hi uluk takin thla tin endik zel a ni,” a ti.
Mizoram Finance department chuan kum khat chhunga buhfai enkawlna atan FCS&CA department chu cheng vaibelchhe 220.6 a phalsak tih a sawi. Bank a pung, central puihna tlem azawng an dawn leh, kum khat chhunga state buhfai ei tur an inpek zawng zawng, retailer lawmman, hostel ho tana buhfai man tlawm kg. ah Rs.6-a an pek zawng zawng, heng huam vek hian, tuna data thar berin a hrilh dan chuan kum khatah cheng vbch. 67-in an inenkawl thei a, Finance department-in sum a phalsak atangin vbch. 139 chu sawrkar treasury-ah an chhunglet tih Supply minister hian a sawi.
“ZPM sawrkar hian buhfai bothlau a vil uluk em em a, sum bo thlau a vil uluk a, kum khata cheng vbch. 130-140 vel senna turah khan vbch. 67 velin kan enkawl thei ta a ni,” a ti.