Bul tannaah Verstappen bawk chak leh nghal

Pathianni khan Bahrain Grand Prix hmangin 2023 Formula One world championship bul an tan a, world champion tum hnih ni tawh Max Verstappen bawk chungnung leh berin, Red Bull one-two kan hmu a, pahnihnaah a team-mate Sergio Perez thlengin, podium hniam ber luahtu chu Aston Martin driver Fernando Alonso a ni.
Sakhir tlankawnga a hnehna sualchhuah kha Bahrain ram grand prix-a Dutchman Verstappen-a chak vawikhatna leh a career-a race tum 36 a chak tlinna a ni.
Middle East-a hnehna nuamsa chang Verstappen hian a tir atanga a tawp thlengin hma a hruai tluan teuh hle a; a bultan dan enin a zawna world title pathum la thei turin rin a kai nghal.
Red Bull one-two hlenchhuaktu pakhat zawk Mexican Perez khan pahnihna a sual laiin Charles Leclerc nen an inbitum viau hman a, mahse, lap 16 tlan tur a la awm tihah pathumna a nih laiin Ferrari driver Leclerc kha tlan zawm thei loin a tawp a, hahdam zawkin Perez-a’n pahnihna dinhmun a luah.
Bahrain intlansiaka phurawm ber lai min hmuhtirtu erawh opening lap-a Mercedes driver pahnih Lewis Hamilton leh George Russell-te hnunga pangana atanga pasarihna lama tlathla, chumi hnua podium luah tura rawn fight chho leh thei Alonso kha niin, Spaniard hian a first pit stops hmain Russell a lehpel hman a, an second stops hnuah Hamilton el lehin, chutah Sainz a hnaih chho leh a; Hamilton leh Sainz a chhaihbuai dan kha F1 expert-te chuan quality sangber lantirna niin an sawi.
Alonso leh Hamilton kha lap hnih chhung an inthlur ngar ngar a, Turn Four-ah Spaniard hian Briton a lehpel ta nge nge a, he intlansiaka Alonso chet dan hi mit titlai ber a tih theih ang.