Bundesliga hmeichhe head coach hmasaber Marie-Louise Eta

Bundesliga club Union Berlin chuan kum 2023 July thlaa coaching staff atana an sengluh Marie-Louise Eta chu tun season tawp thleng head coach lailawk atan an hlangkai a, he team-in hmeichhe head coach an rawih vawi khatna niin, Europe league lian zual panga khel club men’s team zinga hmeichhe manager ruai hmasaber an ni nghal.
Interim head coach dinhmuna Eta an dah chhoh rual hian Inrinni league match-a FC Heidenheim laka 3-1-a team tlawmpuitu Steffen Baumgart chu an ban fel nghal a ni.
Team 18 inelna Bundesliga table-a 11-na luahtu Union Berlin hian tun dinhmunah league match 29 atangin point 32 an hum mek a, khelh nga chiah awm tawhah point 11-in automatic relegation zone an kalsan mek a; tlakhniam theihna hmun hi la hlat fu mah se kumin bikah league game 14 an khelh tawh atangin vawi hnih chiah an la chak a, Inrinni maiah pawh an tlawm leh avangin season an khar dan tur hi a chiang lo hle a, an hmeichhe head coach thar hnuaiah hian eng tak ang zui ang maw?
Kum 34 mi Eta hi record thar siam kawngah a mikhual hran lo a, November 2023-a Union Berlin thoin assistant coach atana an hlankai khan Bundesliga bika hmeichhe assistant coach hmasaber a lo ni tawh.
Khatih laia manager Nenad Bjelica hnuaiah khan assistant coach hna a thawk kha a ni a, match thum chhung Bjelica an hrem lai January 2024 khan Marie-Louise Eta hian Darmstadt lakah si khat faiin Berlin a chakpui a, kha mi tum pawh khan hmeichhe coach zinga touchline atanga Bundesliga team kaihruai thei hmasaber a lo ni tawh bawk.
Germany youth international hlui Eta hian professional football a khelh laiin Turbine Potsdam chu Women’s Champions League title a lakpui tawh a; fgootball a chawlhsan hnuah coaching lam luhchilh zui nghalin, July 2025 atang khan Union Berlin under-19s manager hna a thawk tan a, kumin nipui a herchhuah meuh chuan he club women’s head coach hmasaber a ni chho ta luah a ni.
Union director of men’s football Horst Heldt chuan season second half-a an result puak chhuahah lawmna tur reng reng an neih loh thu sawi chungin league-a an dinhmun chu ngaihthatthlak loh leh him lo a nih thu a sawi a, tunhnai kan hnung chhoa an result avangin inrintawkna an hloh a, boruak thar nen bultanna thar an mamawh tih a sawi.
Eta pawhin a dinhmunin a ken tel mawhphurhna chu chona lian a nih thu sawi ve nghalin, relegation play-off khelh phakna hmun (16-na) luah mektu St Pauli laka point sarih chauha an chungnung chu him lo a tih thu leh season thara Bundesliga team nih leh an tumna kawngah an dinhmun a himn hauh lo tih a sawi.
Berlin head coach thar chuan, “He chona lian tak hmachhawn tura ka chunga rinna an nghat ngam hian min tilawm a; kan dinhmun hi him lo ngei mah se Union chakna ngulpui zinga pakhat ni kumkhua – hun harsaa kan intelkhawm tlatna chu a la ngai reng a, kan mamawh point hlu tak tak kan hmaa beisei tur la awmte hi kan chan ngei ka ring nghet tlat a ni,” a ti.