Bungkawn leh Muanna Veng an champion

August 17, Inrinni zan khan Volleyball hmanga YMA Branch hrang hrangte inelna lian leh ngaihhlut hlawh ber Inter Branch YMA Volleyball tournament vawi 23-na zawh fel a ni a, Bungkawn leh Muanna Veng an champion. Hmeichhe lama champion Bungkawn hian final-a an khingpui Vaivakawn an hneh a. Mipa lama champion Muana Vengin Hunthar an hneh ve thung.
Bungkawnin record an siam
Hmeichhe final hi zirtawp zan khan R. Dengthuama Hall, Mualpuiah khelh a ni a, Bungkawn YMA team chuan set hloh lovin Vaivakawn YMA team an hneh. Bungkawn hi YMA Volleyball ah vawi 8 champion thei hmasa ber an ni a, Kanan nen an record intawm an tlanpel a champion ngun ber record thar an siam.
Record thar siam turin Bungkawn hian an mahni ang thova vawi sarih champion tawh Kanan chu semi-final-ah an lo hneh tawh a, final-a an khingpui Vaivakawn an sawp zui leh. Vaivakawn lakah hian awlsam takin set khatna an la a, set hnihnaah inhnehtawk viau mah se set an la nawn leh. Set hnih an lak zawn vangin an khingpuite an tizam a, set thumnaah an khingpuite hian point hnih bak an hmu thei lova, nuamsa fahranin set an la nawn leh a, 25-17, 25-23, 25-2 a hnehna changin an champion. Bungkawn hi kum 1999, 2000, 2001, 2012, 2014, 2018 leh 2022-ah an lo champion tawh a. Kum 2024-ah an champion leh zui bawk nen vawi sarih champion tawh Kanan record an thaichhiah a, vawi riat champion hmasa ber an ni.
Hmeichhe inelnaah hian Bungkawn an champion theih nana thawhhlawk tak F. Lalparmawii chu Best Spiker-ah thlan a ni a. Bungkawn setter Melody Lallawmkimi chu
Best Setter-ah thlan a ni bawk.
Muanna Vengin Hunthar an dang
Hmeichhe lamah Bungkawnin record thar an siam rualin mipa lamah Hunthar pawh vawi li champion hmasa ber record siam thei dinhmunah an ding ve bawk. Maubawk nen vawi thum champion thei ni dun mek Hunthar hi record thar siam thei dinhmunah ding mah se vawi khat champion tawh Muana Vengin an dang a. Hunthar leh Maubawk champion zat hnaih leh zual turin Muanna Veng hi a vawi hnih nan an champion.
Kum 2018 champion Muanna Veng hian vawi riat final luta vawi thum champion tawh Hunthar lakah an khel tha viau a, set hloh lovin hnehna an chang thei hial. Set thum an khelh chhungin Hunthar nen an point a inthlau lo viau zel a, an inlehthal tawn zak zak hnuin Muana Veng hian set an la leh mai thin a, champion phuin an inlan. Valbuanga hova chetha tak Muanna Veng hi Volleyball thiam veng Hunthar in an ngam lo hlek a, an tihawm loh tak tiin Muanna Veng lakah set an la zo lo. Inkhel hmuhnawm tak hi beisei aia hmain a tawp a, Muanna Veng chuan 25-19, 29-27, 25-21 a hnehna changin a vawi hnih nan an champion ta a ni.
Inelna neih chhunga khel tha fal, Muanna Veng champion puitu Vanlaltanchhana (Valbuanga) chu Best Spiker-ah thlan a ni a. Valbuanga tan tha tak taka ball chhawpsak thintu Lalliankima chu Best Setter-ah thlan a ni bawk.
Volleyball hmanga YMA Branch te inelna lian leh ngaihhlut hlawh ber YMA Volleyball hi kum 1989-an Mipa inelna hmanga tan a ni a. Kum 1990-ah chhunzawm niin hmeichhe inelna telh tan a ni. Tun thlengin hmeichhe inelna neih tam zawk a ni a, hmeichhe inelna hi vawi 22 neih tawh a ni. Vawi riat champion tawh Bungkawn chu champion ngun ber an ni a, an hnuai chiahah hian Vawi sarih champion tawh Kanan an awm. Kum 2024 thlengin mipa inelna hi vawi 17 neih tawh a ni a, vawi thum champion tawh Hunthar leh Maubawk te champion tam ber an ni dun mek. Hunthar hi final vawi kua ngawt an lut tawh a, final-ah vawi ruk zet vanduai zawkah an tang tawh. Hetihlai hian Maubawk erawh chu vawi thum final an lut a, an champion vek thung.
Mipa lamah hian vawi hnih champion tawh team hnih; Dawrpui Vengthar leh Champhai te an awm thin a, 2024 champion Muana Vengin an rawn belh ve leh. Muanna Veng hi a tlahniam thut lo a nih chuan Vawi thum champion thei huangah an inhlankai thuai a beiseiawm.