Bungkawn tlangval chhuanawm pahnih…

Bungkawn tlangval pahnih Lalnunpuia Renthlei leh David Zothankima chuan chawlhkar ruk chhung zet awh NIS hnuaia Certificate Course in Sports Coaching (Basketball) chu tha takin an rawn zo fel hlawl e.
Sports Authority of India (SAI) Southern Centre, Bangalore-ah theory leh practical kar thum ve ve training-a fiahna hautak zet an paltlang hnuin Mizoram an rawn rap leh ta – state hrang hrang atanga kalkhawm he batch-ah Lalnunpuia Renthlei hi a titha ber a ni pha hial!
He training khirhkhan takah hian, “Examiner hmaah practical leh fitness te, hmachhawp bawhzui tur siam thiam leh zirtir thiam chungchangte trainer-te’n kan lantir vek,” tiin Bungkawn tlangval R-a hian The Aizawl Post Hoops Mania zawhna a chhang.
Mahni senso veka Mizoram basketball hmasawnna tura penchhuak kan tlangval pahnihte hian an thiamna leh theihna an thehchhuah hun a nghahhlehawm takzet.