Buzz Aldrin-a’n a piancham 93-naah nupui nei
Neil Armstrong te nena thla (moon) a lawn hi, Armstrong dawta mihring zinga thla leilung rap hmasa ber dawttu, astronaut Buzz Alrdin chuan a pianchampha 93-na lawm pahin Los Angeles-ah rei tak a lo ngaihzawn tawh, amah aia kum 30 a naupang zawk Dr. Anca Faur, kum 63, chu ‘tiam tlat e’ a tihpui ta a, Aldrin chuan an nupa an nih takah chuan “tleirawl inru thar ang maiin kan phur a ni,” a ti.
Buzz Aldrin tan tun hi nupui pali a neihna a ni tawh a, 1954 atanga 1974 thleng Joan Archer nen an innei a, 1975 atanga 1978 thleng Beverly Van Zile nen inneiin, 1988 atanga 2012 thleng Lois Driggs Cannon nen an innei tawh bawk a, Joan nen hian fanu Janice Aldrin leh fapa pahnih Andrew leh James Aldrin te an nei.
Anca hiUniversity of Pittsburgh chhuak, Chemical Engineering and Catalysis a Ph.D nei a ni a, science leh chemical company hriathlawh tak Johnson Matthey a Project Manager thin a ni a, mahse, 2019 atang khan Buzz Aldrin Ventures LLC-ah executive vice president a ni ta, an lo inzui rei ve tawh viau a, an inkar pawh hi an thup lem lo va, 2021 khan tuna a pasal nita Aldrin-a kum 91 tlin lawmpuina thuthawn te pawh a lo ziak tawh nghe nghe a ni.
Buzz Aldrin hi 1969-a thlaa inkap kai, Apollo 11-ah khan Lunar Module Eagle pilot a ni a, an mission commander Neil Armstrong dawta mihring zinga thla leilung rap hmasa ber dawttu a ni. Apollo 11 space mission-ah hian Neil Armstrong leh Michael Collins te nena kalho an ni a, Armstrong hian August 2012 khan chatuan ram a pan tawh a, Collins pawhin April 2021 khan cancer avangin khawvel a lo chhuahsan ve leh tawh bawk a, Buzz Aldrin hi mihring zinga thla a inkap hmasa ber zinga a dam awm chhun a ni tawh a ni