By election atan roll tlangzarh

Local council leh village council thenkhat seat ruak hnawhkhahna tur leh Siaha-a District Council bial pakhat hnawhkhahna atana by election neih tura draft electoral roll chu Ningani khan tlangzarh a ni.
Aizawl district-a Ramhlun South Local Council thiah tak (seat 7) leh Mauchar Village Council seat khat ruak hnawhkhahna tur draft electoral roll chu district election officer, bawrhsap Nazuk Kumar chuan a tlangzarh a. Ramhlun South LC-ah hian vote nei 4679 an awm a; Mauchar VC-ah hian voter 724 an awm.
Siaha district election officer, bawrhsap Lalhmunsanga Hnamte tlangzarh tak draft roll-ah hian Mara Autunomous District Council hnuaia Siaha East-I MDC constituency-a inthlan turah voter 2781 an awm a; New Saiko VC general seat pakhat thlan turah vote nei 113 an awm. Roll pahnih hi MLA inthlanpui hnuhnung bera roll behchhana siam a ni a; non-tribal erawh paih an ngaih avangin MLA roll hnuhnung ber hi a ngai ngaia hman theih a ni lo tih DEO hian a sawi.
Mamit district election officer, bawrhsap VL Remliana tlangzarh tak draft roll hi Khawrihnim Village Council-a member boral seat ruak hnawhkhahna tur leh Lianbuang (Bekabekya) VC thiah taka by election neihna tur a ni a. Khawrihnim VC-ah hian vote nei 651 an awm a; Lianbuang VC-ah hian vote nei 246 an awm.
Final electoral roll hi August 30-a tlangzarh tur a ni a. State Election Commission-in inthlan hun tur hi a la puang dawn a ni.