Bye-election 13-ah INDIA-in seat 10 la

State hrang hranga bye-election seat 13 a neihah INDIA bloc te chuan seat 10 an la a. BJP te chuan seat hnih chauh la theiin Centre a ruling party ni mek chuan hniam lam pan zelin Prime Minister Narendra Modi credibility a tlakhniam zia pholanna a ni bawk.
A pumpuiah Congress te chuan seat li – Himanchal Pradesh leh Uttarakhand-ah seat hnih ve ve an la a ni.
Himachal Pradesh-ah hian Assembly seat thumah bye-election neih niin Congress te chuan seat hnih la in tihian Assembly member 68 awmnaah seat 40 an nei a ni. Tihian Rajya Sabha inthlan laia Congress sorkar a phatsanna awm te chu nuai boin a awm tawh tura ngaih a ni a.
Lok Sabha-a Leader of Opposition Rahul Gandhi chuan State pasariha bye-election neih result chuan ‘BJP ten hlauhna hmanga an vialchiat chu tihchhiatin a awm’ tih a tilang chiang tiin a sawi a.
“Class hrang hrang loneitu, thalai, labourer, sumdawng leh hnathawk tin ten dictatorship tihtawpa rule of justice dinchantir an duh a ni. Mipuite chu tunah chuan an nun that zawk nan leh Constitution humhim nan INDIA lam an awn ta” tiin Rahul Gandhi chuan a sawi.
Congress president Mallikarjun Kharge chuan mipuite chuan BJP te invaivungna, sorkar kalpui dikloh leh negative politics te an hnawl hmak tih a lang tiin a sawi bawk a. “Modi leh Shah political credibility tlakhniam zia a pholang bawk” tiin Kharge chuan a sawi.
Congress general secretary K.C. Venugopal chuan ‘democracy tan hnehna niin BJP divisive politics hnawlna a ni bawk’ tiin a sawi bawk a. Himachal Pradesh result bikah Venugopal chuan, “BJP te politics leh horse trading mipui tena an duhlohzia pholanna a ni” a ti bawk.
Bye-election a INDIA chakna chhan chu ‘mipui nawlpuiin BJP te pro-rich dictatorial politics an duhlohzia lanna a ni’ a ti bawk a. Chumai bakah ‘opportunism’ hnawlna a ni tibawkin Congress atanga chhuaka BJP ticket a ding pakhatmah Himachal Pradesh leh Uttarakhand-ah tling an awm lo.
Uttarakhand a Badrinath leh mangalur seat a hnehna kan chan hian mipui ten politics a hlawk nan sakhuana hman an duhlohzia an pholanna a ni a, Ayodhya ah kan hmu tawh a, tunah Badrinath ah kan hmu leh a, mipui ten an duh lo, tiin Venugopal chuan a sawi bawk.