Wealth Tax chungchangah PM Modi

Congress te chuan Prime Minister Narendra Modi chu tun thla tawp lama Brazil a Rio de Janeiro a G-20 Finance Minister meeting neih hunah billionaire te laka wealth tax 2% lak rawtna chungchangah a dinna sawi turin an ngen a. G-20 meeting ah hian he mi chungchang hi sawihona neih a ni dawn a ni.
Congress general secretary (communication) Jairam Ramesh chuan khawvel pumah billionaire te chuan tax sang zawk pe se tih duhna a lian em em mek a ni. Brazil, G-20 presidency nei mek rawtna chu France, Spain, South Africa leh Germany te pawhin an thlawp a, khawvel hian billionaire te lakah wealth tax 2% lak ni se an duh a ni.
“India-in billionaire 167 a nei a. 2% wealth tax lak ni se, kum khatah 1.5 lakh crore hmuh theih niin chu chu kan GDP atanga 0.5% dawn a tling a. Chu mi hmang chuan school. damdawi in, renewable energy leh investment pawimawh tak tak kan ram hma lam hun atan kan siam thei dawn a ni,” tiin Ramesh chuan a sawi a.
He mi chungchanga Modi sorkar dinna chu hriatchian ngei an phut thu a sawi bawk a. “Kan non-biological PM hian ‘billionare tax’ ah a dinna eng nge ni le? Rio de Janeiro a tun thla tawp lama sawihona neih hunah India dinna tur eng nge?” tiin Ramesh chuan zawhna a zawt bawk.
Tun hnai lawkah G-20 ram president leh prime minister hlui te chuan billionaire te laka wealth tax lak an duh thu open letter hmangin an sawi a ni.
Brazil chuan he mi chungchang hi president a nih angin sawiho turin a chhawpchhuah zingah a tel a ni.