C Ronaldo chunga chuang Messi
Inrinni zing khan Major League Soccer (MLS) ah Inter Miami chuan Mimuala an khingpui New York Red Bulls chu 5-1 ngawtin an hneh. New York Red Bulls an hneh tum hian Lionel Messi chuan goal a thun.MLS season kal meka chetha tak Messi hian penalty tel lova goal thun tam lamah Cristiano Ronaldo a khum. A elpui lian Ronaldo lakah kawng khatin a chungnung a, a chungah a chuang thar leh.
Ballon d’Or vawi riat ngawt dawng tawh Lionel Messi hian New York Red Bulls laka goal hnih a thun hmangin club leh ram tan goal 874 a thun tling chiah. Goal 874 zingah hian penalty atanga a thun goal 110 a tel. Penalty tel lovin goal 764 a thun tling a. Penalty goal chhiar tel lohin Cristiano Ronaldo aiin goal a thun tam zawk a. Ronaldo aia goal thun tam zawkna hi goal khat chiah a ni thung a, inlehpel tawn thei dinhmunah an ding a. Chungnung zawk nih inchuhin an inum zui zel tura ngaih a ni.
Messi hian goal 874 thun tling turin game 1,114 a mamawh a. A elpui lian Ronaldo aiin game 167 zetin a khel tlem zawk. A khelh tlemna ti khawpa a tam chunga an goal thun a inthlau lo viau mai hi Lionel Messi ropuizia tifiah leh zualtu a ni. Messi hian club leh ram tan trophy lak theih zawng zawng a la kim tawh. Inelna ngaihhlut hlawh ber Fifa World Cup-ah Argentina a champion pui tawh vangin khawvela footballer ropui ber ang hial a ngaih ngheh a ni a. ‘Football a thlengchhuak’ ti hialin a chanchin an sawi thin.
Lionel Messi elpui lian Cristiano Ronaldo hian Ballon d’Or vawi nga a dawng tawh a, Messi a phak lohna hi vawi thum lai a ni. Ronaldo hian club leh ram tan vawi 1281 khel tawhin goal 938 a thun tling tawh a, goal 1000 thun tlin tumin hma lam a pan mek. Goal 938 a thun zingah hian penalty atanga a goal thun chu goal 175 lai a ni a. Penalty atanga goal thun tam lamah Messi aiin goal 65 laiin a thun tam zawk. Ronaldo hi goal thun hnem ber ni mek mah se Messi aiin a khel tam zawk viau thung.
MLS season kal mekah Lionel Messi a vul thar leh a. Goal 18 thunin top-scorer a ni mek. Inter Miami tan a chetthat chhoh em vangin World Cup 2026-ah Argentina tan tha takin a la inlan thei ngei tura ngaih a ni.