CAA-in Citizenship Act kalh tiin khing mek

Citizenship (Amendment) Act rules chuan India khua leh tui nih diltute chu an awmna rama khua leh tui an nihna hnawl turin a ti lo va, chu chuan dual citizenship awm theihna siamin chu chu Citizenship Act bawhchhiatna a ni tiin petitioner te chuan Supreme Court hnenah an zualko.
April 9-a hearing neih hmaa petitioner tena ziaka an thehluhah CAA rules March 11 a tihchhuah chu stay rih tura ngenin, Section 9 of the Citizenship Act of 1955 leh Article 9 of the Constitution te chuan dual citizenship neih chiang takin a khap a ni tiin an sawi a.
CAA chu December 31, 2014 hmaa Afghanistan, Bangladesh leh Paskistan atanga Hindu, Sikh, Buddhist, Jain, Parsi leh Christian community tihduhdah tawh avanga an awmna ram atanga dan kalha India ram lutte chak taka khua leh tui nihna pek theihna a ni.
Petitioner te hi Indian Union Muslim League ten kaihruaiin senior advocate Kapil Sibal leh advocate Haris Beeran te chuan an dinsak a. Kum 2024 Rules chu thil fel lo tam tak awmna niin kihua leh tui nihna pek theih nana ram dang khua leh tui nihna a hnawl hmasak phawt ngai tih te pawh enkán a ni, an ti bawk.
Dual citizenship remtiha pakhat zawk Indian khua leh tui nihna neih bawk chuan Rules chu hleih bik neiin a siam a ni tiin an sawi bawk.

Ahmadiyyas, Rohingya te telh lo
Petitioner-te chuan CAA-ah sahuana thila tihduhdah chu a inphum nghet hle an ti a. Union government chuan heng ram sawi lan state religion nei ram atanga refugees te chu a chhawk leh hnemna niin a ngai a.
Mahse CAA chu raltlan thlanbik ‘selected group’ tan chauha siam a ni tiin petitioner te chuan an sawi a. Refugee group hnawl te chu illegal immigrants an la ni reng dawn a, engti kawng mahin Indian khua leh tui nihna nei ve thei lo turte an ni an ti bawk.
“Ram tarlan zingah Pakistan a tel chungin Pakistan a tihduhdah tuar nasa ber pawl Ahmadiyya community te chu hual teltir an ni ve lo. Chutiang bawkin rationalists, atheists leh agnostic te sakhua nei ve lote pawh huam tel tir an ni lo” tiin petitioner chuan a tarlang bawk.
Myanmar atanga refugees te huam teltir an ni lo bawk a, Myanmar chu kum 1935 thleng khan British India huam chhunga awm niin International Court of Justice pawhin Muslim Rohingya te suat tumna a awm a tih hial leh India rama hrehawm taka awma thawn let leh mai theiha awm reng te an ni chungin huam tel tir an ni lo a ti bawk.
CAA leh Rules te chuan Sri Lanka, thenawm ram mai Tamil Hindus te tihduhdahna hmun pawh a huam tel lo a ti bawk a.
Statement of Objects and Reasons of CAA chuan ‘partition’ leh ‘undivided India’ chu non-Muslim te chu ‘protected class of refugees’ ah a thlang a ti chungin CAA chuan unvidived India a tel ngai ahuh lo Afghanistan chu a huam tel tir tho bawk an ti bawk a.
“Hei avang hian CAA hian minority tih duhdahte khua leh tui nihna pek a tih chu a bul thutah a fuh lo hrim hrim a, a nihna takah chuan tihduhdah tuar group hrang hrang thlanbikte tan chauha ruahman zawk a ni. Telh hmaih lam ni lovin hmaih neih nuai hian refugee policy dikhlel tak a pholang zawk” tiin petitioner te chuan an tarlang bawk.
Khua leh tui nihna chu ‘dikna chanvo neih theihna’ a nih laiin thleibik neia khua leh tui nihna pek chuan constitutional issue a siam zawk a ni tiin petitioner te chuan an tarlang bawk.