Chakma Autonomous District Council (CADC) Inthlanpui 2023 buatsaiha constituency dang ruala inthlan theih lohna, Rengkashya MDC biala polling station pathuma vote tlate chu Zirtawpni zing khan Chawngte ah chhiar a ni a. He biala candidate pathum zinga vote hmu sang ber, Indian National Congress (INC) candidate Doymoy Daveng Chakma chu returning officer David Lalthantluanga chuan tlingah puangin, thlantlin a nihna certificate a hlan nghal.
Rengkashya bialah hian May 17 khan vote thlak a ni a, vote nei 1411 atangin 1314-in electronic voting machine-ah vote an thlak a, vote tla percentage hi zaah 93.13 a ni.
INC candidate Doymoy Daveng Chakma chuan vote 713 a hmu a. MNF candidate Prema Ranjan Chakma chuan vote 572 hmuin, BJP candidate Sukrity Chakma chuan vote 26 a hmu a. NOTA-a vote tla 3 a awm.
Heti hian CADC Inthlanpui 2023 neih zawh takah CADC hnuaia bial 20 awmah Mizo National Front (MNF) chuan seat la tam berin MDC seat 10 a la a. Bharatiya Janata Party (BJP) leh Indian National Congress (INC) ten seat 5 ve ve an la a ni.
CADC-a bial khatah INC chak
Get real time updates directly on you device, subscribe now.
Prev Post
Next Post