Mizoram Police FC kum 50 tlin lawm
Mizoram Police FC kum 50 tlin lawm
Mizoram Police Sports & Cultural Control Board bultumin ‘Mizoram Police Football Club Golden Jubilee Celebration Programme’ chu Zirtawpni khan hman a ni a. Mizoram Police FC-a player ni tawhte chawimawi anni a, thi ta te sunna hun hman niin, exhibition match neih a ni bawk.
Hmanpuitu Sports & Youth Services minister Lalnghinglova Hmar chuan Mizoram Police Football Club chu Mizorama football tihmasawntu pawimawh tak a ni, tiin, ram pawn thlenga football hmanga inelna hrang hrangah Mizoram hming timawi thintu in, Golden Jubilee thleng theia an inkaihhruaina leh enkawlna fakawm a tih thu a sawi.
Infiamna chi hrang hrangah Mizo thlalaite thiamna leh theihna haichhuak tur chuan mi nawlpui ban phak sports infrastructure tha siam a pawimawh tih a sawi a. Heng infiamna hmanga hlawhtlinna tluantling nei tur chuan kan lawm zawng leh nuam tih zawng sports discipline chauh thlang loin, hma kan sawnpui theih tur thlan thiam a pawimawh tih minister hian a sawi.
“Mizoram sawrkar flagship program – Bana Kaih Scheme kaltlangin sports tihmasawn tum a ni a, sports discipline hrang hranga thalaite theihna haichhuahna tur ‘talent identification’ leh an theihna tuaihriamna tur ‘coaching’ kalpui tum a ni a. India’s Olympic Vision 2036 tinzawn chunga Mizo infiammite tan ruahmanna kalpui thiam a pawimawh a ni,” a ti.
Mizoram Police FC:
* Kum 1974 khan 1st Bn. MAP commandant KC Thanga hmalakna in BN Mullick Memorial All India Police Football Championship-a tel tur Mizoram Police Football Club din a ni a. H Lalchhuanliana chu team captain a ni.
* Tournament hrang hrangah telin ram pawna inelnaah an inlan chho a. Kum 1974, 1979, 1980, 1984, 1985, 1994 leh 1997-ah Pachhunga Memorial Football Tournament champion an ni.
* 1990, 1992, 1993 leh 2000 kum khan Royal Bhutan Kings’ Cup-ah an champion a, 71st BN Mullick Memorial All India Police Football Championship 2023 khan an champion bawk.
* Tournament hrang hranga lawmman an lak zingah – MFA Super Cup 2019 leh 2021, MPL-10 champion (2023), Independence Day Football Tournament 2024 champion leh MPL-11 (2024) runner up a tel a ni.