CADC-a MNF sawrkara CEM tura hual RM Chakma leh District Council & Minority Affairs minister Robert Romawia Royte) CADC-ah MNF-in seat la tam ber

CADC-a MNF sawrkara CEM tura hual RM Chakma leh District Council & Minority Affairs minister Robert Romawia Royte)
CADC-ah MNF-in seat la tam ber
11th Chakma Autonomous District Council (CADC) atana Member of District Council (MDC) Inthlanpuiah MNF chuan party malah seat la tam berin seat 10 a la a, sawrkarna an siam theih thu an thlen ang.
Vote tla hi Ningani zing dar 8.00 atangin Chawngte ah chhiar tan a ni a, bial 20 awmah tuna inthlanna bial 19 a vote tla chhiar niin, bial awm zawng zawng chuhtu party pathum zingah Mizo National Front-in seat la tam berin MDC seat 10 an la a. Bharatiya Janata Party-in seat 5, Indian National Congress-in seat 4 an la a. Bial 13 chuhtu Zoram People’s Movement chuan seat lak neiloin an nil a ni.
Inhnehna sang ber chu 11-Ajasora bialah niin, BJP ticket-a thlan tlin Santosh Chakma chuan amah hnaih bertu MNF candidate Subaranta Chakma chu vote 591-in a khum a. Vote inthlauhna hniam ber chu 3-Chhotapansury bialah niin, INC candidate Supreme Raj Chakma chuan amah hnaih bertu ZPM candidate Shanti Jiban Chakma chu vote 19-in a hneh.
11th CADC-ah hian 10th CADC-a MDC mi 16 chu an dinna bial ngaiah theuh ding nawnin, mi 7 chu thlan nawn an ni a, mithar (MDC ni lai ni lo) 12 an tling a ni.
Party mala seat la tam ber MNF chuan sawrkarna an siam theih thu an thlen dawn a, chief executive member atan Rashik Mohan Chakma chu rawt a ni.
Candidate tualthi an awm avanga bial dang ruala inthlan buatsaih theih lohna 15-Rengkashya bialah May 17 khian vote thlak a ni dawn a. May 19-ah vote chhiar a ni ang.
CADC inthlanpui tluang taka buatsaih a nih theihna’na tha thawhtu, inthlan buaipuitu official leh mawhphurhna pek zawng zawng, political party leh NGO te leh inthlan hlawhtling tak a awm theihna’na vote thlaktu mipui chungah returning officer, Lawngtlai district bawrhsap David Lalthantluanga chuan lawmthu a sawi a ni.