HSLC 2023 topper Cynthia Lalhlupuii Shangpliang) HSLC pass percentage 71.14 Top 10-ah hmeichhia 14 lang

HSLC 2023 topper Cynthia Lalhlupuii Shangpliang)
HSLC pass percentage 71.14
Top 10-ah hmeichhia 14 lang
Mizoram Board of School Education (MBSE) chuan Ningani khan High School Leaving Certificate (HSLC) 2023 result a tichhuak a. Pass percentage hi nikum aia tha hreini zaah 71.14 in an pass a, top 10-ah zirlai 17 langin heng zinga 14 hi hmeichhia an ni.
HSLC 2023-ah hian zirlai 18102-in exam an hmachhawn a, an zinga 12878 an pass a, hlawhtling zo ta lo 5162 an awm a ni. A pumpuiah Cynthia Lalhlupuii Shangpliang, St. Paul’s HSS chu pakhat a ni a, mark 500 awmah mark 485 hmu in subject parukah letter a hmu a ni. 2-na chu mark 481 hmutu Alicia Malsawmsangi, St. Paul’s HSS niin a ni pawh hian subject patukah tho letter a hmu. Mark 478 theuh hmu in 3-naah mi pathum – Deborah R. Lalhmingmawii, St. Joseph HSS leh Lalnunsangi, St. Joseph HSS Aizawl ve ve leh Srijita Samanta, St. Paul’s HSS an awm a ni. 5-naah pahnih an awm leh a, Valalrinawma, St. Joseph HSS chu mipa zinga a sang ber niin 5-naah hian a awm a. 7-naah mi pathum, 10-naah pahnih an awm leh a, 10-na pahnih hi mipa ve ve niin, 5-na pakhat zawk leh 10-na pahnih te chauh hi top 10-a mipa lang pha an ni.
Distinction-ah 1302-in an pass a, first division 3488, second division 4731, third division 3357 leh compartmental chance nei 62 an awm a. School zaa za pass 107 awmin pass awm lohna school 14 an awm a ni.
Kum hmasa lamah HSLC pass percentage hi zaah 70.64 a ni a, kuminah sang hretin zaah 71.14 a ni.
An mark hmuh zat, result dinhmun enthat leh duh tan subject hnih aia tlem lo chinah ennawn dil theih a ni a, May 19 aia tlai loah MBSE-ah ennawn dilna hi thlen theih a ni.
HSLC result tihchhuah takah hian School Education minister Lalchhandama Ralte chuan thuchah siamin, MBSE-in tluang taka result a tichhuak thei leh, result tha leh felfai taka chhuah a ni chu rim taka thawktu MBSE officer leh staff te, Directorate of School Education leh District-a officer leh staff te, zirtirtute, police leh Health department-a thawktute leh administration lama thawktute chungah a lawm hle tih a sawi.
Zirlai hlawhtlinna hmu tharte a lawmpui tih sawiin, an hma hun kal zel turah duhsakna a hlan a. Tuna hlawhtlinna chang ve ta lote pawh beidawng mai lo tura chahin, tun aia tha zawka bei turin an rilru siam a, hlawhtlinna la chang ve ngei turin duhsakna a hlan tih a sawi a ni.