CADC Budget Session nei mek

Chakma Autonomous District Council 11-na Budget Session hmasa berah bill pahnih – ‘The Chakma Autonomous District Council (Constitution, Conduct of Business, etc) (Seventh Amendment) Rules 2024’ leh ‘The Chakma Autonomous District Council (Management and Control of Cremation and Burial Grounds) Bill 2024 pass a ni.
Bill pass tak zinga pakhat zawkah hian House leader, chief executive member Rasik Mohan Chakma chuan CADC (CCB etc) Rules 2002 siamthatna tur engemawzat a rawt chu a tel a. Heta langsar tak pakhat chu, Chakma tawnga Council member-te tana Oath of Affirmation siam bakah CADC executive member-te tana Oath of Secrecy siam a ni tih a sawi.
The Chakma Autonomous District Council (Management and Control of Cremation and Burial Grounds) Bill 2024 hian ruang hal leh phum dan tur ruahmanna siama khawtinah ruang halna hmun tlanglawn uluk taka enkawl leh khuahkhirh a tum tih a sawi a ni.
CADC chariman Mohan Chakma kaihhruaiin CADC Session hi neih a ni a. CEM Rasik Mohan Chakma chuan kum 2024- 2025 chhunga Chakma ADC budget a pharh. Budget hi April 16 khian sawihoa pawm tum a ni ang.
Kum 2023- 2024 chhunga Supplementary Demand for Grants chu normal grants -in- aid hnuaia hlawh lakah Rs. 26,56,86,000 a ni a. 2023- 2024 sawrkar kum chhunga local receipts chu Rs. 1,47,24,000 a ni a, target chu Rs. 1,59,75,000 a ni.
CEM chuan Rs. 12,51,000-a an tlin loh chhan chu brick siam chhuah loh vang, market atanga fee lak tlem vang, building atanga a luah man dawn that loh vangte niin a sawi a. Kum kal mek chhunga sum lakluhna tur budget target tihhlawhtlin chu ngaihpawimawh a nih tur thu a sawi.
Financial year hmasa lama budget allocation ang lo takin kuminah chuan state sawrkarin a hranin salary leh non-salary a tarlang lo tih a sawi a. Village council remuneration tih loh chu salary head nena khaikhin chuan Rs. 67,36,000 leh non-salary head Rs. 77,98,000 a ni a. Hlawh atan mamawh leh grants -in- aid pangngai chu Rs. 1,97,93,49,000 vel nia chhut a ni tih a sawi.