CADC inthlanah MNF-in sum an ren lo – MBJP president

CADC inthlanah MNF-in sum an ren lo
– MBJP president
Tunhnaia inthlanah an chet that loh avangin CADC inthlanah MNF chu sum leh paiah an inren lo viau tih BJP Mizoram president Vanlalhmuaka chuan a sawi.
Zirtawpnia an party office-a political session an neihah BJP Mizoram State president chuan CADC inthlanah sawrkar lai MNF-in thaa tan la in, sum leh paiah pawh an inren lo viau tih a sawi a. MADC-a an chet theih tawh loh avangte, LMC-a an chet theih loh avang leh VC/LC inthlanah sawrkar lai mawng hlim a nih avangte in, MNF hian an sum bawmpui hawngin CADC inthlanah hian MDC nei hnem ber an ni ta tih a sawi.
“CADC mipui tam zawk, development beisei ngaihna pawh hrelo ten development an neih ve theihna turin hma kan la zel dawn a. CADC-a sawrkarna chelh tawhte leh state sawrkar te pawhin khaw tam tak an ngaihthah lutuk avanga mipuiin an khaw hmasawnna awm lo chu a nih dan tur emaw ti tlat an nih tawhna lak atanga chhanchhuah hi kan tum leh Mizoram mipui tana kan din chhan a ni,” a ti.
CADC inthlanah BJP-in MDC an beisei ang nei rih lo mah se, an dinhmun erawh a tha hle a, vote share hi 34.59% an neih avangin MLA inthlanah pawh BJP MLA an neih leh ngei dawn tih a chian thu Vanlalhmuaka hian a sawi bawk.
Sakhuana chungchang leh hnam issue a awm apiangin politics-a kaihluh tum tlat party an awm thu te, BJP chu an sakhaw biak leh sakhaw vawnah an nghetin hnamah an chian thu a sawi. “Politics hi kan ram leh hnam aiin kan dah sang tur a ni loa, politics hian kan ram leh hnam leh kan sakhua a tichhe tur a ni lo. BJP Mizoram chuan kan ram leh hnamah inunauna tha leh ralmuang a awm theih nan, hma kan la zel dawn a, hnamdang laka huaisen taka kan din theihna tur leh kan state hi mahni kea kan din theihna’n development politics hi kan khelh ber a ni a, mirethei ber thleng phak development hi kan thupui a ni,” State BJP hruaitu hian a ti.