CADC sawrkar namthluk tum

Chakma Autonomous District Council sawrkarah BJP MDC 5 leh MNF MDC 1-in an party atanga banna an thehlut a, sawrkar thar din tum vang nia sawi a ni.
Thudawn danin December 8 khan party pahnih MDC hian an party president-te hnenah party member an nihna an bansanna lehkha an thehlut a, an awmzui dan tur erawh sawi a ni lo. MNF MDC chhuak ta hi Chakma ADC-a chairman nilai Kali Kumar Tongchangya niin, BJP MDC chhuak ta te hi Hiranand Tongchangya, Amit Bayan Chakma, Sanjeev Chakma, Ajoy Kumar Chakma leh Parimal Chakma te an ni.
An awmna party chhuahsan MDC-te hian Kali Kumar Tongchangya kaihhruaina hnuaiah Chakma Autonomous District Council ah ZPM sawrkar din tumin hma an la mek nia thu dawn a ni.
Chakma ADC-ah hian kumin May 9 khan inthlanpui neih niin, hemi tuma inthlan theih lohna Rengkashya bialah a hnu ah inthlan neih leh a ni. Bial 20 awmna CADC-ah MNF-in seat 10 la in, BJP leh INC in seat 5 ve ve an la a; MNF hian anmahni thlawptute nen sawrkar siamin chief executive member atan Rashik Mohan Chakma ruat a ni. CEM nilai hi MLA inthlanah Tuichawng bialah MNF ticket-a dingin thlantlin a ni a, CEM a nihna hi a la bansan rih lo a ni.