California-ah mass shooting thleng lehin mi pasrihin nunna an chan phah a, dance hall-a mass shooting avanga mi 11 in nunna an chan hnu lawk ni hnihnaah a thleng zui leh a ni.
Tuna inpawngkah thlenna hi San Francisco atanga 50km vela hlaa coastal city Half Moon Bay ah a ni.
-- Advertisement --
Silai hmetpuaka chevel hi kum 67-a upa tualchhung mi Zhao Chunli a ni a. Lunar New Year lawmna neih laia Asian te tamna Monterey Park a nunna chan te sunna neih mek laiin inpawngkah chiam hi a thleng leh a ni.
Silai hmetpuaktu hi police-te hnenah mi a kah hnu darkar hnih hnuah a inpe a, a inpe lai hi news camera te chuan an lo la nghe nghe a ni.
A kahhlum hmasa palite chu mushroom farm-ah hmuh niin a hnuah pathum dangte chu trucking business-ah hmuh an ni a. Eng vanga silai hmetpuak vak nge a nih hriat a la ni lo.
San Mateo County Sheiff Christina Corpus chuan news conference a neihnaah rinhlelh bera hian local police station panin a inpe tiin a sawi.
Semi-automatic pistol a keng a, police ten thu an zawtfiah mek a ti bawk. Corpus an a kah pariatna chu damdawi inah dah mek niin a dinhmun a tha lo hle nia sawi a ni bawk.
“Hetiang silai hmehpuahna hi a rapthlak a ni,” tiin San Mateo County Sheriff Christina Corpus chuan a sawi a, “Hetiang vanduaina hi kan hre zing ta malh malhhle a, San Mateo County ah hial a thleng ta” tiin a sawi.
Sheriff chuan news conference a neihnaah Zhao an mi a that lai hi naupangte pawhin an hmuh thu sawiin ‘hetiang thil naupang ten mita an hmu hi sawi ngaihna pawh a awm lo’ tiin a sawi.
California Governor Gavin Newsom pawhin damdawi inah vanduaite tlawha a kal nghal thu sawiin ‘Half Moon Bay ah vanduaina a thleng awn awn’ tiin a sawi.
HalfMoon Bay Council member Debbie Ruddock chuan nunna chan te chu Chinese farmworkers te an nih thu sawi a.
San Mateo County Board of Supervisors President Dave Pine chuan he thil thlen chhan hi ‘hnawktu lungawilo’ thiltih a ni tiin a sawi a. “Half Moon Bay a thil thleng hian min ti dam lo” tiin Pine chuan a sawi bawk a.
“Gun violence-in min luhchilh a. Monterey Park silai hmehpuahnaa thi te pawh kan la sun hman lo a nia. Gun violence hi tihtawp a ngai,” tiin a sawi.