Cambodia ramria bomb puakah Thai sipai pathum hliam leh
Ni nga chhung tharuma an inep hnua thla hmasaa inkahhai an puan hnu ni rei lo teah Cambodia nena an inrina hrula patrol-a kal Thai sipai pathum chu chil puah bomb puak vangin an inhliam niin sipaute an sawi.
Thailand-a Sisaket leh Cambodia-a Preah Vihear province inkara Inrinni zinga an patrol-naah hian sipai pakhatin rah puah bomb rap puakin sipai pakhatin a ke a chân a, pahnih dang pawh an na hle niin Royal Thai Armed Forces chuan a puang.
Pakhatin a keah hliam na tak tuarin pakhat dang hi a ke leh banah a inhliam a, pakhat dang pawh a bengdar a chhia niin an sawi bawk.
Cambodian defence ministry chuan ‘ramria sipaite hnen atangin thil puak chungchang hi kan la dawng lo’ tih sawiin an sipaite chu tha taka inkahhai puan zawm tura tih an ni tih a sawi bawk.
Thailand chuan he thil hi an ram chhung chin, tun hnaia chil puah bomb awmte an thenna hmun a ni tih an sawi a. Cambodia hnenah hian hetiang hman phal lohna an bawhchhiat avang leh Thai ram chin an dai avangin hriattirna an pe tih Thai foreign ministry chuan a sawi.
Thailand leh Cambodia ramte hi rah puah bomb hmang lo turin Ottawa Convention-a hming ziaktu zingah a tel ve ve a ni.
Tun hi tun hnai hun rei lo tea ramria patrol-a duty Thai sipaite chil puah bomb vanga an inhliam vawi thumna a ni.
A hmaa thil thleng pahnih avang khan ram pahnih inkar hi a chhiat phah hle a, ni nga chhung an indo zui phah.
Asian chhimchhak ram hnih hi ramri-ah July 24-28 chhung inbeiin kum 20 chuang hnuah an inbeih nasat ber tum a ni a. Laipui leh indo thlawhna hmanga an inkahnaah mi 43 vel an thi.
US President Donald Trump-a’n an pahniha sumdawnnaa inremnaah telh lo tura a vau hnuah July 28 khan inkahhai an puang.
Ningani khan Kuala Lumpur-ah ram pahnih hotute inbe zovin inkahhai pawh sei an rem ti a, an ramri buaina laiah Association of Southeast Asian Nations (ASEAN) atanga entu luh an phalsak ve ve bawk.
Bangkok chuan Cambodia chu Thai ram chhunga rah puah bomb kamah puhin July 16 leh July 23 khan an sipaite an hliam a. Phnom Penh chuan engmah an kam thar loh thu leh Thai sipaite hi kal remtihna chin piahah lutin indo hun laia lo kam tawh an chil puak niin a sawi ve thung.