Cameron Diaz lemchan khawvelah lo kir leh ta

Cameron Diaz lemchan khawvelah lo kir leh ta
‘The Mask’ film kha Cameron Diaz kan hmelhriat tanna a ni. Lemchan khawvelah a hlawhtling a, Hollywood hmeichhe star zinga hlawhtling berte zingah a tel. Mahse, lemchan khawvel a chawlhsan ta daih a, kum 10 vel zet a reh deuh vang vang hnuah lemchan khawvelah bawk rawn kir lehin, kum 10 chuang hnua Cameron Diaz channa thar kan en leh thei dawm ta.
Diaz hi Jamie Foxx nen Netflix tan ‘Back in Action’-ah an chang dun a, he comedy-action hi Netflix-ah January ni 17, 2025-ah an premiere dawn a, a trailer hmasa ber pawh niminpiah khan an tichhuak ta a, a film-ah hian Cameron leh Jamie Foxx te chu chhungkaw din turin CIA atangin an bang a, nunphung pangngai a nun tum mah se a nihna hlui hriatchhuah a ni ta tlat mai a, spy khawvelah bawk an kir leh a ngai ta a ni.
He film-ah hian Kyle Chandler, Andrew Scott, Jamie Demetriou leh Glenn Close te pawh an inlan. Jamie leh Cameron te hi 2014 khan ‘Annie’ film-ah an chang dun tawh a, 1999 khan ‘Any Given Sunday’-ah an lo thawk dun tawh bawk. Cameron hian lemchan a chawlhsan thu a puan hnuah a khawvel hluia hnuk luttu zingah Jamie Foxx hi a tel nghe nghe a ni.
Cameron Diaz, kum 52, hi 2018 khan Good Charlotte rocker Benji Madden nen inneiin, fanu Raddix, kum 4, leh fapa Cardinal, thla 7, te an nei tawh a ni.