Campaign-in zin kual thei rih lo

Lok Sabha inthlan a hnai a, Mizoramah pawh candidate-te leh anmahni candidate-tu party-te’n theihtawp an chhuah mek. Campaign-a zin kual hun a ni a, PC party erawh an zin kual thei rih lo.
PC party hian sum an neih loh avangin theihtawp an chhuah thei lo a, Aizawl pawn pawh an zin thei lo tih thu dawn a ni.
“Kan che thei lo a ni e. Sum ber a awm loh chuan campaign tak tak a har a, kan zin ve thei lo,” an party president Vanlalruata chuan a ti.
March thla chawhnu lamah khan an candidate Rita Malsawmi leh party hruaitute chu Kolasib-ah an zin a, Kolasib leh Kolasib kawng khuaahte an campaign. Hei bak hi zin chhuakin an la campaign lo.
“Zin turin pawisa a ngai a, kan nei si lo a, kan rilru chu tang hle mah se kan zin thei lo,” Ruata chuan a ti a, “Zin hi chu kan tum ve reng a, tunah pawh kan tum reng. Mahse kan che thei lo a ni e,” a ti bawk.
Aizawl khawpui chhungah a theih ang angin an campaign a, mi inah lengin an campaign thin.
“Mi ina len kual hi kan tih theih chu a ni rih a, social media hmangin kan campaign bawk a. Khaw dang hi kan la thleng zo lo a ni,” Ruata chuan a ti.
Zin chhuaka campaign an tum thu a sawi a, senso tur pawh an thiam ang angin an ngaihtuah a, an zin chhuah ve theih ngei an beisei thu a sawi.
Candidate dangte chu khaw hrang hrangah an zin a, Mizoram khua a tam thei ang ber tlawh an tum hlawm. Party mite nen khaw hrang hrangah an zin a, campaign hun a tam vak tawh loh avangin thahnem an ngai tlang hle. Inthlan lo awm turah hian Mizoramah candidate paruk an awm a ni.