Campaign laia auhla angin ZPM sawrkarin sawhthing lei rawh se – Dr Lalmalsawma

MLA inthlan dawn campaign laia an sawi angin, a grade sawi rih loa, tute emaw leisak leh leisak loh pawh nei loa, sawhthing chu lei phawt turin ZPM sawrkar an phut tih Congress treasurer Dr Lalmalsawma Nghaka chuan a sawi.
MPCC treasurer chuan Agriculture minister leh adviser to CM ten thlai thar lei dan tur an sawinaah sawhthing bik lei leh hralh chungchanga hmalak an tumdan thenkhat chu a chingtute tan him lo a nih theih avangin a tha lo hle tih a sawi a. Mipuiin sawhthing leh thlai dang lei tura an intiamna an ngai thutak a. Chhungkaw tam takin an ching a, a khua khuaa sawhthing ching pawh an awm tih a sawi.
Survey mumal tak neiin research based-in plan fel tak hnuaiah heng ruahmanna hi siam niin ZPM party hruaituten an insawi a. He ruahmanna hi en thuak chuan tha awm tak nia a lan laiin, zirchian chuan kuthnathawktute beidawnna thlentu a ni ang tih a (phek hma zawmna…)
hawm a; sawhthing programme-ah hian an insawi angin ruahmanna felfai tak an siam lo nia a lan thu a sawi bawk.
Sawhthing grade A leh B siam leh ‘Grade A’ chauh Rs.50 leh a chunglama lei tum a, grade B chu a chingtute leh a leitute inbiakrem tura dah chu a tha lo hle tih Dr Lalmalsawma hian sawiin, “Mizoramah sawhthing hi grade-a then a nih kan hre ngai loa, an then a nih chuan grade then dan tur, a quality eng chen nge tih inkaihhruaina a awm loh bakah a leitu ten ‘grade B’ anga sawhthing quality an then teuh chuan a chingtuten an tuar dawn. Sawhthing leitute hian grade then dan an tih uluk viau a, an fin phakar viau chuan sawhthing grade kha an tihniam vak thei a ni,” a ti. Sawhthing lei tura duhsak bik thlannan grading hi siam a ni em, tih a zawt a ni.
Tender hmanga hralh bang hralh dan turah company nen agreement fel tak siam ngei turin an chah tih Congress hruaitu hian a sawi a. Kumin kumtira hmunphiah leitu tur agreememt an siampui ang kha a nih leh a hlauhawm, tiin, company nen tender agreement mumal tak siam ngei turin an phut tih a sawi.
“Hmunphiah an ti zuzi ang khan khan tih zuzi chi a ni ve loa, nem liam a, kan thiamloh a ni loa, nangni thiamloh pawh a ni lo, kan agent thiamloh a ni ber mai,” tih ngawt chi a ni ve lo, chhungkua leh khua a nghawng tam lutuk,” a ti.
An policy leh manifesto-a an ziah angin ZPM sawrkarin an kalpui ngei a ngai, tiin, leisak leh leisak duh lohte, a grade-a then dawn pawhin campaign lai emaw, an sawrkar hnu pawhin, sawhthing chin hun hmaa sawi tur ni awm tak, tuna an ti thar leh chu sawhthing lei an intiamna thulh lehna tur kawng an zawng em ni tih an zawt tih a sawi bawk.

MPCC treasurer sawi dang:

* Khawpui mi sawhthing chingtute ta leisak an tum lo chu thil tha lo a ni, a ti a. Khua leh tui tu pawhin sawhthing a ching a, a chinna khuaa society-ah a inziaklut a nih chuan a leisak ngei tur a ni, tiin, an manifesto angin society-a inziaklutte sawhthing leisak chu an ba a, khawpui atanga thingtlanga sawhthing ching tamtak chu harsa leh rethei tak tak an ni a, inthliarhran chu thil dik a ni lo tih a sawi.
* Society din chungchangah society hruaitu turte chu sawrkar official-te lo tawiawm tura beisei an nih laiin, khaw khata ruling party hruaitute an inruat mai nia a lan thu a sawi. Sawhthing lei leh hralh chu society kaltlanga siam tur a nih dawn si chuan ngaihtuahna a ti thui hle, tiin, society chu ZPM membership fee lak nan hman tumna a awm em ni, tiin a zawt.
* Buh leh thlaite large scale-a chin dawn chuan, chhan hrang hrang avanga chhiatna thleng thei laka kuthnathawktute hamthat nan engemaw tal an dawn let theihna tur, crop insurance tih ngei tur a nih laiin, tuna sawrkarin sawhthing a chintir danah thlai luman (crop insurance) an hmaih a. Sawhthing tam vang emaw khuarel chhiatna vang emawa kuthnathawktuten thlai luman ruahman a ni lo tih a sawi.
* Sawhthing leina tur, minimum support price (MSP) pekna tur a hranpa in budget-ah a awm loa, Banakaih policy hnuaiah vaibelchhe 200 dah bakah nikuma thlai thar leina vbch 110 nen, vbch. 310 awma ngaih theih a ni a. Sawhthing hi sawrkar chhut danin quintal nuai 10 vel thar tura ngaih niin, thlai dang lei tur nena chhut chhuan a beitham hle tih a sawi.
* Sawhthing chawh hun tur sawrkarin ruahmanna siam a tum chu ngaihtuah chian ngai a ni, tiin, sawhthing chu seasonal crop, a chawh hunlaia chawh loh chuan a quality tlahniam thei a nih vangin, hunbi siamsak loa, a hralh theih hun chhunga an hralh vek theih nan ruahmanna siam turin an phut tih a sawi.