India flag nen kawng zawh

India ram zalenna champha lawmna pualin ‘Har Ghar Tiranga’ hnuaiah hnam puanzar nena kawng zawh – ‘Tiranga Yatra’ chu Thawhtanni zing khan district hrang hrangah neih a ni.
Aizawlah chuan Art & Culture department bultumin Chanmari leh Sikulpuikawn inkarah zirlai 800 chuangin India flag keng chungin kawng an zawh a, Vanapa Hall kawtah intawkkhawmin Aizawl bawrhsap Er. Lalhriatpuia hoin ‘Har Ghar Tiranga Pledge’ chham rual a ni.
Bawrhsap chuan ‘Tiranga Yatra’ chu India rama chengte inlungrualna leh inpumkhatna tinghet zual tura buatsaih a ni, tiin, mitinin zalenna hlut zia hre tharin, chu zalenna humhim tura ram leh hnam hmangaihna thinlung put a pawimawh tih a sawi a ni.
Aizawla Tiranga Yatra buatsaihah hian Govt. Mamawii HSS zirlai, Govt. JL HSS zirlai leh Govt. Central HSS zirlaite chu Sikulpuikawn atangin Art & Culture joint secretary Zonunthari’n a vailiam a. Govt. Chaltlang HSS zirlai leh Govt. Mizo HSS zirlaite chu Chanmari kawn atangin Art & Culture director Carol VLMS Dawngkimi’n a vailiam a ni.
‘Har Ghar Tiranga’ pual program hi August 15 thleng kalpui tur a ni a, vawiin – August 13 hian Vanapa Hall-ah ‘Tiranga Concert’ neih tur a ni.