Canada-ah Verstappen ropui leh ber

Ram kang avanga Canadian F1 Grand Prix a sukuk palh theih mai hlauhthawnna a pian hman hnuah Pathianni khan harsat-na awm loin Montreal khawpuia Circuit Gilles Villeneuve-ah intlansiak an zo thei a, driver standing-a hmahruaitu Max Ver-stappen bawk chak lehin, Formula One race-a Red Bull vawi 100 chakna chiah a ni.
Red Bull tana mellung pawimawh phuntu Dutch driver Verstappen tan a career-a F1 race hnehna tum 41 a chan tlinna chiah niin, Brazilian triple champion boral ta Ayrton Senna ‘record’ a nihrualpui.
1994 San Marino Grand Prix-a a chet-sualna hliam tuar loa thi ta legendary Brazilian Senna chak zat a tluk rualin kum 25 mi Verstappen hian race-a chak tam lamah tluk loh pali a la nei a, chu’ng mite chu Alain Prost, Sebastian Vettel, Michael Schumacher leh Lewis Hamil-ton-te niin, tun ang zela a chak chhoh chuan Prost (51) leh Vettel (54) chak zat hi a tluk chhoh theih mai an ring.
Montreal khaw tlankawng Circuit Gilles Villeneuve-ah Fernando Alonso chuan pahnihnaah Aston Martin car thlenpuiin, tun kha season kal laia intlansiak vawiriata Spaniard-in lawmman semna dawhsan vawiruk a lawnna a ni.
Pathumnaah rawn chetha chho leh tan mek Mercedes driver ropui Lewis Hamilton a thleng.
World champion tum sarih tehreng ni tawh Briton Hamilton hnung chiahah hian Ferrari khalhtu pahnih Charles Leclerc leh Carlos Sainz an indawt ve bawk.
Red Bull hian tun season-a intlansiak zawng zawngah hnehna la chang fai vekin, double world champion Verstappen chu vawiruk a chak tawh a, Pathianni Canada kha a zawna tum li a chakna niin, intlan-siak dang pahnihah a team-mate Sergio Perez chu pakhatna a ni ve tawh bawk a, Oracle Red Bull Racing-in kumin F1 grand prix an la thunun hneh hle a ni.
Red Bull team principal Christian Horner pawh a tawng pawr tawh hle a, tun season-a grand prix tlan hmabak la awm zawng zawng pawh an driver-te’n an hui vek theih a beisei thu a sawichhuak.
Canadian F1 Grand Prix-ah Red Bull-in mellung phun bawk mah se an Mexican driver Perez chuan beisei a pha lo tlat a, paruknaah thlengin, intlansiak hnuhnung pathumah a zawnin ‘podium’ a lawn zo lo!
Mexican hi qualifying lama a chet that loh avangin 12-naah a tlan chhuak a, paruknain a ken tel point pangngai bakah fastest lap ken tel bonus point khat a hlawhchhuak tel.
Tunhnai chhoah talbuai rih mah se Perez hian drivers standing-ah pahnihna luah zui zelin, point 195 nena hmahruaitu Verstappen lakah point 69-in a hniam.