Cancer damdawi inneih!

Cancer damdawi inneih!
Chuap (lung) cancer te chuan nupui emaw pasal emaw an neih hian a nei ve lo te aiin an dam rei zawk niin mithiam ten an sawi a, cancer dang prostate, lu leh nghawng cancer-ah te pawh nupui/pasal neih chu a tha niin an sawi.
University of Maryland-a mithiam ten chuap cancer nasa tawh tak (advanced lung cancer) mi 168-ah zirchianna neiin, heng dam lo te hi kum 2000 leh 2010 inkarah chemotherapy leh radiation hmanga enkawl an ni a, chung zinga nupui/pasal nei tawh hmun thuma thena hmun khat te chu kum thum an enkawl tawh hnuah pawh an la dam a, chutih laiin kawppui nei lo te chu 10% chauh an dam thung a ni.
Hetianga nupui/pasal nei te cancer dan in ang rau rauah kawppui nei ve lo te aia an damrei zawkna chhan hi thil dang teh vak pawh a ni lo, cancer vanga dam lo te chuan an nitin nunah puitu an mamawh a, an inenkawlna-ah te tanpuitu an mamawh a, damdawi ina kalpui leh inentir tih velah pawh tanpuitu an mamawh a ni. Hetiang hun hmangaih taka enkawltu nupui/pasal an neih vangin an damrei zawk niin an ngai a ni.
Zirchiannaa an hotu Elizabeth Nichols chuan, “Nupui/pasal neih hi cancer nasa tawh te tan damreina a ni a, a chhan tak chu hrechiang rih lo mah ila, kan hmuh dan atangin cancer natna tuar ten social support an hmuh that vang niin kan ngai. Kan research atang hian cancer vanga dam lo ten enkawltu leh buaipui tu tha tak an neih hian cancer therapy techniques tam tak aiin a thawk hlawk zawk niin kan ngai a ni. Cancer enkawlna tur damdawi tha zawk hmuh chhuah kawnga tan lak zel a ngai a, chutih rualin dam lo te hmangaih leh duat taka enkawl dan pawh kan thiam tel a ngai a ni,” a ti.
He zirchianna chungchang hi 2012 Symposium on Thoracic Oncology, Chicago-a neihah an chhawp chhuak a ni.