Cancer hospital-in kentel ngah dawn

Japan International Cooperation Agency (JICA) bultuma Mizorama Super Speciality Cancer & Research Centre din tum chuan cancer enkawlna chauh niloin, kentel tam tak a nei dawn.
Health & Family Welfare minister Dr R Lalthangliana chuan Mizoram State Super Speciality Cancer & Research Centre (MSSSCRC) Zemabawk din tum chu zawhfel a nih hnuah cancer natna avanga sum tam tak senga phai pan buai a ngai tawh dawn lo tih a sawi a. He project hi cheng vaibelchhe 700 senna tur niin, a taka kalpui a nih hunah chuan Mizoram tan mai ni lo, India hmarchhakin an rawn pan tur niin a sawi.
Health department hotute sawi danin, uper Speciality Cancer & Research Centre dinna tura JICA sum tum hi sawrkar laipuiin min rulh sak tur a ni a; khum 200 awmna tur niin, he project hian cancer enkawlna bakah rehabilitation leh research lam tihna a ni tel dawn a; cancer enkawlna leh hmuhchhuahna lama khawl mamawh tha ber ber chia thuam a nih dawn bakah mipui zirtirna lam – cancer veite hmuhchhuah hmana tur leh cancer chungchang hrim hrim mipui nawlpuia inzirtirna lam thlengin a kengtel dawn tih an sawi a ni.
Health minister-in Zoram Medical College dinhmun a sawi danin, khum 140 vel awm thin kha khum 470 an dah tawh a; ICU khum 13 awm thin kha PICU, NICU leh ICCU zawng zawng nen khum 72 an dah tawh. Sawrkar damdawi in hrang hranga doctor post ruak 50 chuang awm mek chu ZMC atanga MBBS zir zo tawh mi 70 internship ti mek ten an zawh hunah hnawh khah a nih tur thu a sawi.