Cancer laka min vengtu chaw \ha

Cancer hi natna hlauhawm, tute pawhin kan hlauh em em a ni a, khawvela thihna thlen tamtu natna a ni bawk. Times of India health section-in a tarlan danin 2018 chhunga khawvela mithi paruk zela pakhat chu cancer vanga thi angin an chhut. He natna hi zuk leh hmuan kan tih leh zu in te hian a risk a tisang tih te pawh an hre deuh vek tawh awm e. Chutihrualin awareness kan la neih tam lohna chu cancer awmna chhan top 5 zinga pakhat chu nutrition- a bik takin ei leh in hrisel lo hi a ni. Chutiang bawkin technology lamah kan thang chak a, kan awm awl telh telh a, kan ei leh in lamah pawh natural food, kan immunity tichak thei nutrient pai tam, cancer do theitu te kan ei tlem ta telh telh bawk.
Cancer dotu chaw tha ber ti a han sawi theih chu a awm lo nain, chaw hrisel ei hian infection leh harsatna neuh neuh awm thei lakah min veng a, chu chuan cancer risk pawh a tihniam nghal. Mithiam te chuan chaw thenkhat anti-angiogenesis hmanga cancer lo dangtu a awm niin an sawi a, cancer laka kan taksain natna a do theihna tichaktu langsar zual te chu thlai hnah hring, aieng, sawhthing, basil leh thyme te an ni. Heng te hian cancer do theihna an nei chak hle a, chubakah kan thluakah antioxidant an supply a, chu chuan free radical zawng khawmin cell chhe tur a veng nasa hle bawk. Tichuan taksa vûng leh bâwk awm tur vengin cancer risk an tihniam nasa thei hle a ni.
National Cancer Institute-in International Study an neih atanga an hmuh danin kar khatah chaw atana thei leh thlai tum ruk ring te chuan, chaw atana thei leh thlai vawi 1.5 chauh ring te aiin cancer risk 29%-in an nei hniam zawk niin an sawi a, thei leh thlaihnah ei nasa te zingah nghawng leh lu cancer risk a hniam lehzual niin an sawi bawk.
Theirah aiin thlai te chu cancer venna kawngah an la thawk hlawk leh zawk a, thlai zingah pawh broccoli, parbawr, zikhlum, tomato leh carrot te chu cancer risk an tihniam lehzual. Theiah chuan thei thur ho hian cancer risk an tihniam lehzual bawk, heng theithur te hian antioxidant leh phytochemicals an pai hnem. Chaw dang heng aieng, bean, nuts, thakthing, olive oil leh purunvar te pawh hi cancer risk tihniam theitu chaw tha an ni.