Cancer: Survey & Research

Kumin February ni 3-a Mizorama World Cancer Day hmannaah khan, Mizoramah chuap cancer chu mipa leh hmeichhiaah vei an tam ve ve tih sawi a ni a. Tun dinhmunah Mizoram hian, state-a mihring cheng zata chhuta cancer vei tam berna dinhmun a hauh mek a ni.
Cancer natna chungchanga tuna information kan dawnte hi ‘survey’ hmanga hriat a ni a. Survey report atanga a lan dan chuan mipa lamah – chaw kawng cancer, pumpui cancer leh chuap cancer vei an tam ber a; hmeichhia lamah hnute cancer, chhul hmawr cancer leh chuap cancer vei an tam ber bawk.
Mizoram Population and Hospital Based Cancer Registries(MPBCR), Civil Hospital, Aizawl-in Mizorama Cancer vei zirchianna (survey) a buatsaih kha 2022-ah health minister-in a tlangzarh a. Kha survey kha information pawimawh tak a ni a, cancer chungchanga hmalaknaah hmanraw pawimawh tak a ni ang tih a rin theih a. Mahse, India rama cancer hluarna ber state dinhmun hi survey lo deuh, a aia chipchiar leh rintlak zawk ‘research’ hmanga chhui chian a pawimawh dawn hle a. Hei hi hriselna kawngah, Mizoram state tan chauh pawh ni lo, India ram pumpui tan hian a pawimawh a, sawrkar laipui lam chakna hmachhuana Mizorama cancer dinhmun research puitling zawk kalpui tura hmalak a pawimawh dawn hle a ni.
A nihna takah chuan survey hi chu research kalpuina atana kawng zawh ngei ngei ngai, a bul tanna kailawn pakhat kha a ni ve mai a, ‘data lakkhawm’ a ni ber awm e. Heng data lakkhawm hmang hian ‘engvanga chumi khami cancer chu lo awm nge a nih tih thuk zawk leh chipchiar zawka zirna leh chhuina ‘Research’ hi kan kalpui hma chuan, cancer natna ven dan turah ngaihngam taka hma han lak zung zung a awl-ai lovang tih a rinawm.
National Cancer Registry Report 2020-in a tarlan dan pawhin, India ram pum huapin ‘Mizoram chu mipa cancer vei tamna ber, chuap cancer leh rilpui cancer vei tamna ber a ni mek’ tih a nih laiin, ‘heng cancer thlentu ber chu vaihlo vang niin an ngai’ tih a ni a. ‘Niin an ngai’ tih hi research hmanga tihchian a pawimawh dawn ta a ni. Hetiang bawk hian, vaihlo ni lo, ei leh in thil dang avanga cancer natna lo chhuah dan pawh, research hmanga tihchian ngei hi, cancer vei tamna ber state nihna hian a phut tel a ni.