Cannes Film Festival chhimin Mizo film siamtu pahnih an kal

Cannes Film Festival chhimin Mizo film siamtu pahnih an kal
Khawvel huapa film festival lian leh ngaihhlut hlawh ber France-a kumtina an neih thin Cannes Film Festival 2023-ah Mizoram atangin film siam lama tui leh hetiang lama sultu pawimawh pahnih Aldrin Zosangliana leh Napoleon RZ Thanga te chu Information & Broadcasting Ministry hmalakna a North East state tin atanga palai pahnih tirh turah thlan an ni.
Kumin Cannes festival hi a vawi 76-na a ni tawh a, May ni 16 atanga tanin, May ni 27 thleng a awh dawn a, khawvel huapa lemchan lama milar leh film siamtu hriathlawh te a pungkhawm thin a, kumin hian Indian film pawh pali- Kanu Behl siam ‘Agra’, Anurag Kashyap film ‘Kennedy’, ‘Nehemich’ leh restored Manipuri film ‘Ishanhou’ te chu classic section-ah chhuah an ni.
Cannes Film festival-a film chhawpchuah (competition, non competition & special screening) te hi cinema hall 20-ah zing 8:30 atanga zan dar 10 thleng chhuah thin a ni a, film screening bakah international film market pawh a awm. Cannes film festival-ah hian ram thenkhat ten pavilion an nei a, India pawh in pavilion a nei a, he pavilion-ah hian film hmalak dan tur te leh hmachhawp te sawi ho thin a ni bawk.
Aldrin Zosangliana chuan, “Khawvel huap film festival ropui bera kan kal thei hi Pathian hnenah lawmthu ka sawi rualin, film siam kawnga zofate’n hma kan sawn theihna atana tha tur hrang hrang kan kawhhmuh ve theih ngei ka beisei,” a ti.