Captain atangin Maguire an ban

Manchester United chuan an defender Harry Maguire chu an captain atangin an ban a, captain thar an ruat dawn. Captain atanga an ban vanga lungawi lo Maguire hian Old Trafford chhuahsan ngei a tum a, eng club nge a zawm dawn a la chiang lo.
English Premier League club lian Manchester United chuan Leicester City atangin Harry Maguire chu kum 2019 khan manto takin an la lut a. Ma-guire manah hian £80m zet an seng a, tun thlengin defender manto zingah a la tel reng. Leicester City atanga an lak luh hnu thla lekah manager Ole Gunnar Solskjaer chuan team captain-ah a ruat a, Maguire koah mawhphurna sang tak a tla. Solskjaer hnuaiah tlatlum viau mah se manager thar Erik ten Hag hnuaiah a pawi-mawhna a hloh a. Raphael Varane leh Lisandro Martinez an lak luh hnuin khelhna hmun a chang hleithei tawh lo.
Khelhna hmun a chan hleitheih tawh loh vangin manager Erik ten Hag chuan captain atanga banin, captain thar a ruat dawn tih a hrilh. Ten Hag-an thu thin thawng a hrilhna hmun hi Carrington training ground-ah a ni a. He thu a hriat hnu hian Maguire hian lunghnur takin training ground a chhuahsan. Harry Maguire thlaka United captain thar ni turin midfielder Bruno Fernandes chu rinkai ber a ni mek a. Brazil midfielder Casemiro pawh United captain thar ni thut thei dinhmunah a ding bawk.