Cardi B-i’n WWE SummerSlam 2025 host dawn

Cardi B-i’n WWE SummerSlam 2025 host dawn
Rapper Cardi B chuan kumin WWE SummerSlam a host dawn tih puangin, X-ah video a post a. August thlaa zan hnih chhung WWE SummerSlam neih turah a zan hnihin a host ve ve dawn a ni.
Cardi B chuan video clip a tihchhuahah hian Eddie Guerrero T-shirt hain, “Khai le, WWE universe lam maw?” tiin ban a vai a, “In hria em? Summer Slam. MetLife. Zan hnih. Ka host ve dawn ta nge nge e,” a ti a, a tawpa WWE star rual montage rawn langin, “Kan rawn inlan dawn e!” tiin a tawp a khar ta a ni.
2025 WWE SummerSlam hi MetLife Stadium, East Rutherford, New Jersey-ah August ni 2 leh ni 3 zanah neih a ni dawn a, Cardi B hian 2021 SummerSlam-ah pawh khan inlan a duh tawh a, mahse, a naupai lai nen a innang ta tlat a, a inlan thei ta lo nain a hla ‘Up’ chu official theme-ah hemi kum hian an hmang ta tho a ni.
SummerSlam 2025 hi e event ni hnih chhung an neih vawi khatna tur a ni a, May ni 2 atangin ticket pawh an hralh chhuak tan ang.
Cardi B sawi takah chuan a single thar ber, Pardison Fontaine nena an thawh dunna ‘Toot It Up’ a tichhuak hlim deuh hlawl a la ni a, Smurfs movie rawn chhuak thar leh tura soundtrack-ah telin, DJ Khaled nena an thawh dunna ‘Higher Love’ chu thla hmasa lawk khan an tichhuak tawh bawk.
Cardi B hian 2018 khan a album ‘Invasion of Privacy’ a tlangzarh a, hemi hnuah hian album dang a la nei leh lo a, a album pahnihna tur hi a buaipui mek niin a sawi a, “Artist ka lo thawhpui tawh te leh ka la thawhpui ngai lo te pawh ka album-ah hian an rawn lang ang. A barakhaih ve hlawm ngawt ang che u. He album-ah hian 100%-in ka inringtawk,” a ti bawk.