Case titawp tura police ngenna court-in a hnawl

Chhingchhip Villge Council-in ni 100 inhlawhna sum an hman dan diklo chungchanga puhna Anti-Corruption Bureau (ACB) in an chhuina case titawp tura an dilna chu Special Court Prevention of Corruption Act chuan a hnawlsak bakah chhuinawn turin Lokayukta leh ACB a hriattir.Chhipchhip VC hmasaten MNREGS atanga mipui thawhkhawm an dawn Rs. 7,06,400 a nih laiin, VC thar hnenah Rs. 2,01,559 an hlan a, a bak an sum hmanna leh an hnathawh a inmil loh avangin chhuifiah a nih theih nan VCP thar Lalnunmawia chuan FIR a thehlut a ni.
Chhingchhip VC sum hman dan hi preliminary enquiry-ah thil dik lo awm ngeia a lan avangin Special Court (PC Act) chuan anticipatory bail an dilna pawh a lo hnawlsak tawh a. Case IO (in-charge officer) chuan he thubuai hi ngun taka chhui hnu ah thubuai an siamsakna chhan tling hmu loa ngaiin court-ah case tih tawp dilna (closure report) a thehlut a. Court chuan thil diklo awm ngeia a lan si avangin chhuinawn leh tha a tih avangin hetiang hian order a siam a ni.
Court chuan case tihtawp dilna case IO-in a thehluh lo tawngpawng pawm hi a bat a ni lo tih sawiin, an report ngun takin a lo enfiah bakah thubuai chhui danah hmaih palh emaw felhlel awma a hriat chuan, pawm loin thubuai a chhui thattir thei tih a sawi.
Hetihlai hian N. Vanlaiphai VC-in college fund atana mipui sum thawhkhawm, MNREGS an dah hman dik lo nia sawi chungchang chhuina thubuai atanga closure report, case IO thehluh chu court hian a pawmsak thung. VC-ten financial management chungchang an inzir nasat a ngai hle tih sawiin, sum hmuhna (receipt) lam chu a chiang thei mai zel a, sum hmanna (expenditure) a chiangkuang lo thei hle tih court hian a sawi. Sum hmanna reng reng chu supporting document a awm loh chuan pawm theih a nih loh bakah a khawihtu leh a hman dana mawhphurhtute chu thubuai siamsak theih an ni tih a sawi bawk.