Catch The Rain

Khawzawl bawrhsap chuan “Ruahtui khawlkhawm, Tuihna humhalh, In chunga ruahtui tla dahkhawl, Leihnuai tui tih tam” (Catch The Rain movement) chu Khawzawl district-ah hma lak tan tura inbuatsaih mek a nih thu leh, he movement tihlawhtling tura mipuite hma lak dan tur ngenna leh hriattirna a tichhuak a. Hriattirnaah chuan thil pathum: Lo neitu ten an lo lu lamah ‘Recharge Pit’ (Tuihna khawl theihna tur khur) 3×2 feet a zau, feet khata thuk panga aia tlem lo siam theuh tur; Kan chenna in chung leh tuizem te ruahtui tla dah khawl theihna turin chei that vek tur (Office leh zirna in telin); hei bakah hian tui liam/chuang chu lei hnuaia a luh (groundwater recharge) theihna turin a remchan anga ‘recharge pit’ siam zel tur, tih a ni.
Hei hi tun hnaia prime minister-in Mann Ki Baat-a mipuite hnena a thuchah bawhzuina a nih thu sawrkar thuchhuahah tarlan a ni bawk.
Jal Shakti Abhiyan: Catch the Rain movement hi kum 2019 khan prime minister hian a lo hawng (launched) tawh a, mahse Covid pandemic avang khan a nihna tur angin chhunzawm theih a ni ta lo va, campaign au hla (tag line) atan Catch the rain, where it falls, when it falls (Ruahtui a tlak hunah a tlakna hmunah ngei lo khawlkhawm rawh) tih kha hman a ni nghe nghe.
Ruahtui khawl khawm tura infuihna hi chu Mizoramah pawh sawi rikna a rei ve ta viau mai. Sawrkar hmasa pahnih te hun lai atang tawh khan ruahtui khawlna tur tuizem te pawh sem a lo ni tawh a. Chhungkaw pawimawh atana hman tur ruahtui khawl khawm kawngah hi chuan kan bengvar ve viau tawh niin a lang.
Hetih rual hian, kan tuihna te hi pun lam pan ahnekin kum tin kiam lam a pan hret hret mek a, chu chu tunah pawh hian sawrkar leh khawltlang, pawl hrang hrangte pawhin kan buaipui ber pakhat a ni tawh. ‘Tuihna tih punna turin thingphun uar rawh’ tiin kan infuih sauh sauh a. Chumi leltling thawk chuan kum tin kan thingphun let za tam tak thing kan kit thlu ruih ruih a, kan hal kang dur dur reng lawi si a ni.
Catch the rain movement chu uar takin i kalpui ila, khur te pawh chu i lai suau suau ila, a theih ang anga tui khawl khawm dan tur kan ngaihtuah chu a ngai reng mai. Chutih rualin, kan sawi thin, thingtlang lo neih kan kalpui dan bawk hi kan mutan lian ber mai a ni a, eng ang pawhin hma han la thin mah ila, kan hmalakna chhilh bo tura a lehlama chetlakna a awm zel bawk si chuan, kan hahpui ang hian kan hlawkpui vak ngai dawn lo tihna a ni ber awm e.