Cavaliers an chak zel

Thawhtanni zing khan NBA khelh chhunzawm a ni a, inkhel hmuhnawm takah Los Angeles Lakers chuan an khingpui Toronto Raptors an hneh. Inkhel dangah Golden State Warriors chuan Oklahoma City an hneh ve bawk.
LA Lakers hian Toronto Raptors lakah bul an tan tha lova, quarter hmasa berah point 8 ngawtin hnufual zawkah an tang nghal. Quarter khatnaah hnufual zawk ni bawk mah se quarter hnihnaah an insiamtha a, point rukin an chungnung ve ta thung. Quarter hnihnaah chungnung bawk mah se LA Lakers hian point hnihna hnufual zawk chungin chawlhlawk an hmang.
Hnufual zawk chungin chawlhlawk hmang mah se inkhel a rei tulh tulh a, Lakers an khel tha tulh tulh thung. Quarter thumnaah point riata chungnungin an khingpuite an lehthal a. Quarter hnuhnung berah point 14 zetin an chungnung zui leh a, Raptors hi point 123-103 in an hneh zui ta a ni.
Toronto Raptors laka an chak tum hian player ropui LeBron James a khel tha leh viau a, triple-double a puitlin. James hian Raptors lakah point 19 a thawkchhuak a, assist vawi 16 a neih bakah ball sawhlet vawi 10 a dawng tling bawk. Raptors an hmachhawn hmaa an match hnuhnung berah James hian triple-doubles a lo puitlin tawh a, NBA-ah a zawnin triple-double a puitlin. Lakers tan hian kum 31 mi Anthony Davis chuan minute 26 chhung lekin point 22 a thawkchhuak hman bawk.
NBA-a player ropui ber ang hiala ngaih LeBron James hian Basketball huangah hnuhma ropui tak tak a hnutchhiah belh zel a. Mimal record ropui tak tak a neih tawh bakah a fapa Bronny James nen LA Lakers tan hian an khel dun a. Pafa a khel hmasa ber an ni nghe nghe.
Thawhtan zinga inkhel dangah Golden State Warriors chuan point 127-116 in an khingpui Oklahoma City an hneh. Warriors tan hian Stephen Curry chuan point 36 a thawkchhuak a, three point vawi 7 lai a vawm lut.
LA Lakers leh Golden State Warriors in hnehna an chan laiin champion lai Boston Celtics chu Milwuakee Bucks hneh lovin an tlawm ve thung. Bucks hian Celtics lakah bul an tan tha viau a, point 11 a hmahruai chungin chawlhlawk an hmang. Chawlhlawk hnu lamah Celtics an khel tha ve thung a, an khingpuite nen an inkar an tizim hman viau. Quarter hnuhnung pahnihah chungnung zawk ni ve ve mah se point 6 in an khingpuite an umphak zo lova, tlawm zawkah an tang ta a ni.
Champion lai Celtics an hneh tum hian Bucks tan 43 chuan point zet a thawkchhuak. Celtics tan hian Jayson Tatum chuan point 31 a thawhchhuah bakah ball sawhlet vawi 12 lai a dawng bawk. Celtics hian season tharah bul an tan chhe lem lo viau a, vawi 11 khel tawhin chak zawkah vawi kua an tang tawh a, Eastern Conference-ah pahnihna an ni mek. Eastern Conference-ah hian tlawm nei lova kal tluang mek Cleveland Cavaliers chu hmahruaitu an ni.