Sinner a chak nghal

Pathianni khan kum khata chetha zual pariatte inelna ATP Finals khelh tan a ni a, World No. 1 Jannik Sinner chuan hnehna a chang nghal. Sinner a chak lai hian Russian star Daniil Medvedev chu Taylor Fritz hneh lovin a tlawm ve nghal thung.
Italy khawpui pakhat Turin-ah ATP Finals hi khelh a nih vangin World No. 1 Jannik Sinner-a’n champion theihna hun tha tak a neia ngaih a ni. Italian Sinner hian vawi sarih a hneh zawn tawh Alex de Minaur hmachhawnin bul a tan. A khingpui Australian lakah harsatna lian a tawk lova, set hloh lovin hnehna a chang.
Sinner hian an tualzawlah ngei bul a tan tha viau a, game thum chauh hloh chungin set khatna a la. Set hnihnaah Minaur a khel tha hret a, Sinners an beisei thei ta viau. Minaur hian set lak theih beiseina nei bawk mah se hun pawimawh takah a serve a hum zo lo. Break pawimawh tak a neih hnuin Sinner hian set a la zui leh a, 6-3, 6-4 in hnehna a chang zui ta a ni. Kum 2024 a khel tha, Grand Slam pahniha champion Sinner hian 2023 khan ATP Finals-ah final a lo lut tawh a, uiawm takin Novak Djokovic lakah a tlawm a, a champion zo lo. 2023-ah champion zo lo mah se 2024-ah erawh champion ngei tumin tan a khawh dawn a, an ram mipuite thlawpna tha tak nen champion theihna hun tha tak a neia ngaih a ni.
Champion tura rinkai ber Jannik Sinner a chak lai hian Ilie Nastase Group-a inkhel dangah Daniil Medvedev chu Taylor Fritz hneh lovin a tlawm ve thung. Kum 2024-a rawn vul thar leh tak Fritz hian Medvedev lakah a khel tha viau a, set a hloh lo. Set khatnaah break pawimawh tak a neih a chhawr tangkai a, game li hloh chungin set a la. Set hmasa a lak hnuin a khel tha zui leh viau a, set hnihnaah game thum chiah a hloh a, Medvedev lakah hian 6-4, 6-3 in a chak zui ta a ni.