CBI chhuitir tumnaah tih dan tur dik takin MNF-in hma a la – J Malsawmzuala
CBI chhuitir tumnaah tih dan
tur dik takin MNF-in hma a la
– J Malsawmzuala
Lengpui Airport chhehvela IAF hnena ram hralh dana CBI chhuitir tumnaah an party chuan a tih dan tur dik takin hma a la tih MNF hruaitu J Malsawmzuala chuan a sawi.
Zirtawpnia Mizo Hnam Run inkhawmah MNF Publicity Board vice chairman J Malsawmzuala chuan, ZPM-in CBI leh Lengpui Airport chhehvel ram lei chungchangah sawrkar hmasate puhchhiat leh beihna atan hman a tum ngar ngar a. An duh leh an cho ang ngeiin MNF chuan tih dan phung dik tak hmangin hma a la a. Dan anga CBI-in a chhui theihnan dan ang takin sawrkarin an complaint a dawng tawh a. Engtin nge hma a lak zel tih an enzui dawn tih a sawi.
CBI-a thubuai chhui tir theitu chu Allocation of Business Rules-ah Vigilance department niin, Vigilance department changtu chu chief minister a ni tih a sawi a. Sawrkar lai berin tihdan phung dik hmang loa, pehhel tum a, party-in a rel tur niawm tak Council of Ministers thurel anga FIR thehluh an tum chu a mak hle tih a sawi a ni.
Restricted tender chungchangah ZPM-in sawrkar hmasa demin a sawichhia a. An tehfung ang chiaha teh dawn chuan, PWD (Highway) hnuaiah kum 2018- 2023 November thleng khan restricted tender pek a awm loa, ZPM kum hnih sawrkar chungin vawi 155, a sumin Rs 1,55,39,49,734 man restricted tender pek a ni tawh tih MNF hruaitu hian a sawi.
PWD (Building) ah MNF sawrkar chhungin restricted tender 95, cheng nuai 53312.46 hu pek a nih laiin, ZPM sawrkar kum 2 chhungin 96, nuai 55196.56 hu pek a nih tawh bakah department dangah tam tak sawi tur a awm tih sawiin, tunhmaa la hriat ngai loh, restricted tender pek huk phalna – ‘blanket approval’ hial pek a ni tih a sawi bawk.
Bana Kaih hnuaiah diltu mi 11439 zingah mi 249 chauh pek an la ni a, a hlawhtlinna rate chu 17% vel a ni tih a sawi. Health care pawh a hmangtu mipui tan tha tak angin lang mah se, chhungkaw 20213 chauh an la inziahluh avangin a zentu an la tlem a, amah leh amah a inbanlek thei rih nia a lan thu sawiin, “Hun lo la awm turah thang hlauhawm tak a nih palh a hlauhawm hle,” a ti.
ZPM sawrkar hnuaiah journalist-te zahawmna humhim theih lohin a awm tih J Malsawmzuala hian a sawi a. Democracy-ah chuan ngaihdan a inang thei loa, an ngaimawh zawng leh an huatzawng hmehmih zel chu ZPM zia a nih hmel, tiin, chunhan pakhat pawh ziak ve lo, jounalist nupui an transfer-na order hi sut leh ngei turin a phut tih a sawi.