CBI-in mi 41 thihna, Kurur innek buaina chhui tan
CBI-in mi 41 thihna, Kurur innek buaina chhui tan
CBI chuan lemchan thiam, politic-a inhmang zui ta, Vijay-a kaihhruai, Tamilaga Vettri Kazhagam (TVK)-in vantlang inkhawm an buatsaiha innek buaina chhuaka mi 41 an thihna, Karur innek buaina chu an chhui tan ta tih Pathianni khan thuneituten an sawi.
Special team chuan Velusamypuram, Karur, Tamil Nadu pawh an tlawh tawh.
September 27 zana TVK huaihawia an hruaitu, Vijay-a thu sawina hmuna innek buaina chhuakah khan mi 60 chuangin hliam an tuar bawk a ni.
CBI hian state police-in thubuai an lo ziah luh tawh sa chu an ziak lut tha veleh a, tual chhung court-in he thil thleng a lo ngaihtuah tawh leh thu a lo zawh fiah tawhte pawh a hai nawn leh dawn a ni.
He thil thleng hi TVK-in Supreme Court-ah petition thehluta a hranpaa chhuitu tur daha CBI chhui tura ti tura an ngenna chu court sang ber hian pawmsakin an kutah a dah a ni.
Court sang ber hian CBI director hnenah officer thawk rei tawh chu he thil thleng chhui hna thawk tura ruat tura hriattirna a pe a, a puitu turin a tul anga officer dang ruat belh turin a ti bawk.
Court hian member pathum awmna, court judge hlui, Ajay Rastogi-a kaihhruai supervisory committee a din bawk a, anni hian CBI-in an chhuina chu a enpui zel dawn a ni.
Justice pahnih, J K Maheshwari leh N V Anjaria thutna, TVK thu thlen ngaihtuahtu bench chuan September 27-a innek buaina thleng khan ram chhunga mite ninna dik tak a lantir niin thu an titlu bawk.
TVK-in vantlang inkhawm an huaihawta chhiatna thleng hi a hnu zelah pawh politic-a inbeihna atan an hmang nasa a, a tirah Vijay-a chuan a thite ralna tur sum tam tak a pe chhuak nghal bawk.
An party hian venhimna kalpui dan fel tawk lo an sawi chhuah laiin police-in an lo chhui tawhnaah chuan mipuiin an nghahhlelh em em, Vijay-a hi darkar thum velin a tlai a, a lan rualin mipui an sahawk ta phut niin an sawi a. Hei bakah hian thuneitute hnena pungkhawm an dilna thlena a zat tur an sawi leh a taka pungkhawm chu an inthlau hle a, hei hian lo inruahman lawk anga venhimna dah pawhin a daih seng lo niin an sawi.
Inpuh tawnna a awm karah hian TVK hian court sang berah chhui hna thawk turin CBI an duh thu hi an thlen a, anni hian an pawmsak zui ta a ni.