CBI koh luh rûn pui…

Lengpui leh Sihphir-a Indian Air Force ram lak tur chungchanga dan dik loa thil tih a awm nia inpuhmawhna awm mekah, tu nge dik a, tu nge dik lo tih hriat theih a ni tawh lo. He thil hi chhui fiah a ngai a, a chhui fiah turin state chhunga a chhui thei turte pawh rin zawh an harsa ta a, Central Bureau of Investigation (CBI) ngeiin a chhui tur a ni, tih ngaihdan lianpui a awm. Inpuhtawn party hrang hrangte chuan CBI ko luttu nih theuh an tum a, “Mizorama CBI koh luh rûn pui” a thleng ta a ni ber.
Nimin khan MNF party leh Congress party-te chuan a hrang ve vein CBI chhuitir tura ngenna an thehlut a. MNF chuan chief vigilance officer, chief secretary Khilli Ram Meena hnenah an thehlut a. Congress chuan Aizawl Unit CBI-ah DIG & Head of Branch,CBI/ACB Imphal address-in an thehlut ve thung a. Sawrkar lai party ZPM pawhin, nimina council of ministers thutkhawm hnuah CBI koh luh hi relin, vawiin February ni 6 hian minister B Lalchhanzova hmingin CBI-ah thehluh ni se tiin an rel ve bawk a.
Tun hma atang tawhin thil dik lo eng emaw lian zual deuh a thlen changin,’CBI-in chhui fiah se a ni mai alawm…’ tia invauna angreng hi a lo ri a lo ri tawh thin a; eng tin emaw a zuzi ral leh mai thin. Tun tumah erawh, CBI ko luttu nih loh bik hlau niawm fahranin, party lian pathumte hi CBI koh luh chungchangah hian an hmanhlel hlawm a, “CBI competitive….” an bei tlang a ni ber.
Thil dik lo chhui fiah ngai chhui fiah tura CBI koh luh hi a ropui em? A chhanna chu, a ropui lo, tih a ni. A ropui loh chhan chu, CBI meuh koh luh ngaia thil ‘ching-chi-vet’ a thleng thei hi a ni. Ching-chi-vet kan tih chu, ‘dik lo taka thiltih, dan bawhchhiatna, thuneihna hman sual, hlemhletna, etc.’ a thleng nia lang mek hi a ni.
Tu te nge inhnamhnawih? A inhnamhnawiha te hi hnam dang an ni lo va, a ram leilung fate ngei an ni a, mimal atanga sawrkar hnathawk officer leh ram hruaitu (politician) thlengin an ni ta ve ang. Dan dik lo hmanga, dan bawhchhe chunga tihfel hram hram tuma a ruka mipui hriat hlau em ema thawkrim thin ni anga han ngaihtuah a, CBI koh luh a ngaih phah hialna hi a ‘ropui lo’ lai chu a ni.
Dikna duh vanga CBI hi koh luh tum ni lovin, dik lo taka thiltih a awm nia a lan vanga CBI hi koh luh ngai zawk a ni a, chulai chu a ropui lo lai tak chu a ni.
Kum thar apianga dik leh rinawm tura intiamna thu chham rual dual dual thin sawrkar hnathawkte leh politicain-te zingah hetianga dan bawhchhe chunga thiltih duh an awm vanga CBI koh luh ngai a ni ta hi a ropui lo a. A chhe lama ‘ber’ nihna nei nual kan nih tawh hnu ahmana CBI koh luh rûn pui a la thleng leh zel hian a eng-a-kima reformation kan mamawhzia a lantir chiang hle a ni ber lo’m ni?!