CEC duh loh lantirna kaihhnawihah FIR ziak lut
CEC duh loh lantirna kaihhnawihah FIR ziak lut
Delhi Police chuan October thla chhunga ram khawpui bera Chief Election Commissioner (CEC) Gyanesh Kumar-a duh lohna lantirna hrang hrangah first information report (FIR ) 57 an ziak lut a, hengte hi chhui turin Crime Branch hnenah hlan vek a ni.
Crime Branch hnena chhui zui tura thawn hi police officer lawkte thutlukna niin district police-in an chhui ai chuan a thiam bik (specialised unit)-in an chhui chu tha zawkah an ngai a ni.
Crime Branch-a officer-te pawhin October 2 leh 23 inkara Delhi-a duh lohna lantir kaihhnawiha thubuai ziah luhte an chhui turin an dawng a, finfiahna awm theite nen an kut a thleng tan tih an sawi a. Delhi Police leh paramilitary sipaiten an taksaa thlalakna an dah (body camera)-in thla a lakte pawh an en fiah mek tih an sawi.
Kumar-a hi October 2 atang khan Election Commission of India (ECI)-in nikum atanga electoral roll a ennawn, special intensive revision (SIR) a kalpuiah vote nei vaibelchhe 13 chuang hming paih a nih hnuah a duh lotuten bâng turin an nawr tan.
Zirlai pawl – All India Students’ Association (AISA), Students’ Federation of India leh All India Students’ Federation te chuan Indian Youth Congress, All India Youth Federation, National Students’ Union of India, Aam Aadmi Party, Congress, INDIA tangrual leh Cockroach Janta Party (CJP) ten Delhi-a Lutyens huam chhunga chawlhkar thum chhung Kumar-a bang tura an nawrnaah an tel a ni.
Hetih chhung hian eptu tangrual, INDIA hruaitu, CJP hruaitu, AISA activist leh zirlai tam tak man leh hren an ni a. Pun khawm huaihawttute leh a telte chuan Delhi Police hian dan dik lovin an hreng a, na takin an bei a, lung ina dah tur leh bus-a nawr lut turin tharumin an bei niin an puh let.
Police chuan CCTV footage, mobile-phone recording, social media video leh posts leh technical-a finfiahna hrang hrang an en fiah dawn tih a sawi.
“CCTV footage, mobile video, social media-a video leh th;alak langte leh technical thila finfiahna en fiah vek a la ni lo va. Video nuai chuang a awm a, chhui chhuah vek a hautak em em a; mahse, a vaiin kan chhui vek ang,” an ti.