Central hian issue base ve thoin kan sawrkar a thawhpui ani ang – K Hrahmo

Central hian issue base ve thoin
kan sawrkar a thawhpui ani ang
– K Hrahmo
ZPM sawrkarin centre-a BJP kaihhruai sawrkar chu ‘issue base’ a a thawhpui tur thu a lo sawi tawh a, centre hian issue base thoin a lo thawhpui ve nge sum lamah harsatna a tawk mek tih BJP MLA K Hrahmo chuan a sawi.
Thawhtannia BJP Mizoram office-a inkhawmah BJP State Core Group member ni bawk K Hrahmo chuan, Mizoram sawrkar chuan issue base-in an thlawp an ti tlat si a, centre hian issue base ve thoin a lo thlawp nge ni dawn, sawrkar hian sum lamah harsatna a tawk mek tih a sawi.
“Kan state sawrkar hi mahni ke in a kal thei si loa, BJP hi thawhpui thiam nise, tuna kan harsatna hi chu sutkian a har lo hle. Sawrkar laipuiin min duhsak a, state sawrkar hian chu hmangaihna chu a hre thin lo hi a pawi takzet,” a ti.
Central Industrial Security Force chu Lengpui Airport-ah an duty tawh a, Airport Authority of India kutah Lengpui Airport a awm tawh niin MLA hian a sawi. Political decision vangin Assam Rifles sawn an ni a, Zoram mipui mamawh ang chu centre hian a ti hlawhtling chho mek zel tih a sawi a ni.
BJP nih avanga Kristian ni lo tura inngaih chu a pawi hle tih sawiin, amah pawh Kristian MLA a ni a; Kristian ni a, BJP MLA a ni chu central BJP an lawm hliah hliah zawk tih a sawi. Citizenship Amendment Act (CAA) pawh Kristiante tan a hlauhawm, tia kan intihthaih laiin CAA hmang hian Kristian mi Joseph Pereira chu 2024 August 28 khan Indian citizenship pek a lo ni tawh tih a sawi a ni.
BJP hlauh chhan pakhat nia lang chu RSS ho an nih hmel tih K Hrahmo hian sawiin, “RSS hi India hnam tungding duh pawl an nih avangin India ram tungding thei tura an rin BJP an thlawp a ni mai a, min thlawp suh u, tih ngawt thiang a ni lo. Ram hmangaihtu party leh hnam tungding duh party nia an hmuh avangin an thlawp a. Chutiang bawkin keini state-ah pawh inthlan dawnin pawl lian deuh min thlawp thei tur kan dap ru thin a nih kha,” a ti.