Central tlawn kan tum lo – CM adviser

Central mi an tlawn ngai loa, tlawn pawh an tum lo tih adviser to chief minister TBC Lalvenchhunga, MLA chuan a sawi.
Mara ADC hnuaia Chakhei bial MDC by election neih tura campaign-a kal ZPM hruaitu TBC Lalvenchhunga chuan, an party chuan sum hman dik an ngaisang a, sum thawk chhuak thei aiin thawk tha ramin a mamawh zawk tih a sawi.
“Central-ah mi kan tlawn ngai loa, tlawn pawh kan tum lo. Kan ram kan enkawl dan turah hian kan chiang a, huaisen takin kan kal zel dawn. Central-a zawm neih leh neih loh avang hian kan chanvo hi a bo dawn loa, central atanga kan sum hmuh hi rinawm taka hman a nih chuan kan ram tan hmasawnna tluantling a awm thei a ni,” a ti.
Kan ram politics-ah danglamna thlen a ngai tiin an au thin a, campaign lai leh Pathian zara sawrkarna an chan hnu in danglamna hmuh tur a tam hle a a hriat thu CM adviser hian a sawi.
“Hna hi kan thawk tak tak a, mipui leh sawrkar hnathawkte thlawpna pawh kan dawng nasa. Ram rorelna hi tih mai mai a ni loa, rim taka hnathawh a ngai. ZPM hian kan tihhlawhtlin theih loh tur kan tiam ve ngai loa, kan policy leh ruahmanna a hlawhtlinna kan hmuh hunah a rah sengtu leh chhawrtu tur chu mipui an ni,” a ti.
Thingtlang politics leh khawpui politics a danglam tlata hriatna chu dah bo a hun tawh a, kan mamawh a inang vek tih MLA hian a sawi. Tui in tur thianghlim, zirna tha, inkalpawhna tha, eng tha leh a dangte, heng zawng zawng hi khawpui leh thingtlangin kan mamawh vek a ni, tia sawiin, “Rorelna tha hnuaiah chuan kan chanvo hi a bo thiang loa, sawrkar hian tha taka hna a thawh chuan kan chanvo a nihna takin kan hmu dawn a ni. Sawrkarin a tih tur a tih loh a, thil a nihna tur a nih loh hian kan chanvo a bo thin,” a ti.