Central YMA-in a tum hnihna atan kawng siam mek endik

Central YMA president R. Lalngheta kaihhruai Central YMA Road Monitoring Committee chuan Inrinni khan Kawnpui -Serkhan- Durtlang kawng (KSD Road), BRTF hnuaia contractor, BRN Infrastructures Pvt Ltd-in an thawh mek chu a tum hnihna atan an endik a. An hnathawha an duh khawp loh lai leh, hna chak zawka an thawh dan tur an sawipui. Contractor te pawhin tha zawk leh chak zawka thawh an tum thu an lo hrilh a ni.
Kawng siamna hmunah CYMA Team hian, alkatra (bitumen) mix sat zawng (temperature) pawh an endik a. Endikna atangin temperature hi degree centigrade 142 a sa a tlin avangin lawmawm an ti a.Chutihrualin, thlasik khaw vawt hnuaia kawng chhuata an chap darh chhungin, temperature hi a tlak hniam chak em avangin, a theih chin chinah chak leh rang zawka khawl hmanga a chap darh hna hi thawk turin BRTF leh contractor hi an hrilh a ni.
Monitoring Committee hian Sairang to Vairengte kawng siam mek pawh an endik a. Helai kawng hi NHIDCL hnuaia company hrang hrang thawh a ni. Company-te hian an harsatna lo thlenin, CYMA hruaitute hian a theih dan ang angin hma an lakpui zui nghal a, sawrkar thuneitute biak sakin, company lam pawh an lawm hle a, chak zawka hma lak an tum thu an sawi a ni.
CYMA hruaitute chuan kawng siamtu contractor hrang hrangte hi furpui thlen hma ngeia an hna thawk zo ngei tirin an hrilh.
2025 December 16-a kawng siam hna an endikna leh, chak zawka hna thawk tura CYMA ngenna chuan awmzia a nei hle tih an hmu a. Hnathawhna hmanrua leh khawl pawh an lo inchhawp kim viau tawh tih an hmuhin, lawmawm an ti hle a. Contractor la inpeih fel chiah lote pawhin January 13 atang chuan an khawl bun thar an hman theih tawh tir thu sawiin, a chak thei ang bera hna an thawh nghâl tir thu an lo hrilh a ni.