Central YMA-in raltlan leh dan loa awm foreigner khuahkhirhna ngaihtuah tum

Kumin October-a YMA Rorel Inkhawmah Mizoram-a raltlante awm dan leh foreigner mi, dan loa sumdawngte khuahkhirhna mumal zawk a awm theihna atana hma lak rawtna a lut
October 22 hian Aizawlah YMA Rorel Inkhawm Vawi 5-na neih a ni dawn a. Hemi huna an thu ngaihtuah tur thlifimtu Central YMA Central Coordination Committee (CCC) chu Nilaini khan Aizawlah an thukhawm.
Rorel inkhawm huna ngaihtuah tura an pawm zingah raltlan leh dan loa awm foreigner sumdawngte khuahkhirh chungchang ngaihtuah hi a tel a. Hei hi sawrkar khawiha an ngaihtuah tur niin, a dang – Bairabi atanga Sairang inkar rel station /sub station-ah uluk zawkin ILP check a nih theihnan Central YMA-in hma la rawh se, tih leh, Mizoram leilungfate himna atan trading regulation felfai tak neih theihnan sawrkarin chak zawkin hma la rawh se, tih a tel.
YMA khawih thurel tur zingah, Central YMA-in aia upa zah inzirtir kawngah tun aia chak zawkin hma la rawh se; Mizo lengkhawm hla a ral mai lohnan khawhar inah a tam thei ang ber sak a nih theihnan Central YMA-in hma la rawh se, tih a tel a. Mizoram pawn company, hna rawn thawktuten thawktu atan ram leilungfa tam zawk an chhawr theihnan Central YMA-in hma la zel rawh se. tih pawh a tel.
Central YMA treasurer Er H Duhkima chuan, 2026- 2027 chhunga Central YMA Budget tur Rs. 2,35,37,850 a pharh a, sawiho a nih hnu in CEC hian a pawm.