Centre/home dintute tan accreditation inhrilhfiah

Centre/home dintute tan accreditation inhrilhfiah
Social Welfare department-a Mizoram Social Defence & Rehabilitation Board chuan Aizawl district huamchhunga ruihhlo ngai enkawlna neitute chu dan anga sawrkara inziahluh a pawimawhna an hrilhfiah.
Mizoram Drugs (Controlled Substance) Act 2016 Section 42 phut angin, Mizorama ruihhlo ngai, de-addiction & rehabilitation enkawlna lam kaihhnawih home/ centre din chuan Social Welfare department-ah dan anga inziahluh (accreditation) vek a ngaih avangin accreditation atana tul leh pawimawh zirtir an ni a. Inkaihhruaina – standard operating procedure (SOP) zirtir niin, endik an nih huna an mamawh leh tih tur tul hrilhhriat an ni.
Social Welfare director Dr Lalhriatzuali Ralte chuan accreditation hi centre leh home hmasawnna atana hmanraw tangkai a ni tih a sawi a. Hriattirna pawh centre hrang hrangah an pechhuak tawh tih a sawi a ni.
Training hmanpuitu Mizoram Youth Commission chairman Malsawmzuala Ralte chuan ruihhlo ngai enkawl kawnga tha an lo thawh tawhnaah lawmthu a hrilh a. Tunlai boruakin sawrkar/ kohhran /NGO/ mimal tin ruihhlo ngaite enkawl kawngah min beng harh a, kawng lehlama ngaihtuah chuan a lawmawm, tiin a sawi.
Ruihhlo ngai tam tak, enkawlna mumal dawng loa khawlaia awmten enkawlna an dawn theihnan MYC leh Social Welfare department thawkdun chuan ‘Hulhliap – Short Stay Centre’ an din tur chu lawmawm a tih thu sawiin, ruihhlo ngaite pawhin damna lamtluang an zawhna rahbi pawimawh a nih an beisei tih a sawi a ni.
Home/ Centre 22 atangin aiawh an intir a. Accreditation hnuaia SOP-in a phut anga lo inherrem ve hret hret tura sawm an ni.