Medog, Tibet-ah China-in 60,000 MW hydroproject khuah a tum chuan Arunachal Pradesh-a Upper Siang district-a hydropower project kalpui tum design a thlak danglamtir phah dawn.
Planning state chauh a la ni chungin India chuan Arunachal Pradesh-ah hian 11,000 MW project siamna turin hma a la mek a, kalpui a nih chuan India rama project lian ber ber te let nga laia lian a ni dawn a. National Hydropower Corporation (NHPC) chuan Central Electricity Authority te hnenah ‘pre-feasibility report’ an theh lut tawh a ni.
-- Advertisement --
Medog-a 60,000 MW dam khuah a nih chuan Brahmaputra-a luang lut tui a tlem phah nasa hle dawn a. Ruahtui tlak that loh kumah phei chuan harsatna nasa thlen thei niin hei mai bakah hian ‘artificial floods’ pawh thleng thei a nih avangin India tan chuan ngaimawhawm tak a ni.
Tuna ruahmanna angah chuan Dam khuah tum chuan furpui lai pawhin ‘buffer storage’ a changin tui 9 billion cubic metres a dawng thei dawn a. Hei hi India tan kum khat tla ni thei dawnin hei bakah hian tuilian thutah vengtu \ha a ni thei dawn bawk.
Brahmaputra hi China-ah chuan Yarlung Tsangpo tia hriat a ni a, 2,880 km-a thui lui hi Mansarovar lake atanga intan niin Tibet ram chhungah 1,700 km a thui a luang a, Arunachal Pradesh leh Assam-ah ah 920 km luangin Bangladesh ah 260 km a luang leh a ni. Freshwater resources 30% vel lai neiin India hydropower potential 40% vel a ni bawk. Brahmaputra lui tui luang hi China dam kaltlanga a tlem a nih chuan Assam leh Arunachal Pradesh-ah agriculture a nghawng hle dawn a ni.
“He project hi Brahmaputra tui lian thin danna tur a ni a, chutihrual chuan thil dang ngaihtuah tel a pawimawhna chu hmuh hmaih a ni lo,” tiin Upper Siang project buaipui tu zinga pakhat chuan a sawi.
Ngaihdan inang lo
Independent expert pakhat chuan India-in hydropower project a kalpui tumah Assam leh Arunachal Pradesh-a tuilian avanga harsatna awm \hin tihtawpna tur a nih chuan a \ha a, mahse, China laka himna tur chu a ni lo a ti thung.
“China hian Yarlung Tsangpo khuap se khawvel ram ten an dem a ring lo a ni. India rama dam lian tak siam erawh tuilian tur danna ti mahse Bangladesh nena tui in\awm an nih avangin harsatna a awm thei a. Brahmaputra luitui luangah hian ram pathum ten langtlang takin information in share tawn se a tha ber,” tiin Rajiv Ranjan, Adjunct Faculty, Institute of China Studies, New Delhi chuan a sawi.
Kumin kum tawp lam hian NHPC te chuan 2,000 MW Subansiri Lower Hydro Electric Project- India rama lian ber leh kawlphetha 2,000 MW lai ni tin darkar li pe chhuak thei chu an hawng tawh dawn bawk a. Hei bakah hian hydropower project dang 2,880 MW leh 6,500 MW te pawh thawh tum leh mek a ni bawk.
Arunachal Pradesh hi hydropower siamna lamah theihna sang tak nei a ni a, mahse, farmland hloh a nasa ve zel a, environment a tihchhiat a nasa bawk a, hei vang hian Arunachal Pradesh sorkar chuan an ramah hydropower project panga chauh awm se tiin Centre-ah a thlen tawh a ni.