Centre phal chin zelin sum kan puk – CM

State-in sum a puk chu sawrkar laipuiin a phal chin ang zel a ni a, hlauhthawn tur a awm lo tih chief minister Zoramthanga chuan a sawi.
Mizoram Journalists’ Association leh Finance department tangdunin Mizoram State Budget zirchianna an buatsaih a hmanpuinaah finance changtu chief minister chuan state sawrkarin loan hrang hrang a puk thin chu state len leh tet dan azir leh state dinhmun azirin sawrkar laipuiin uluk taka a zirchianpui hnu ah, a phalsak ang zela lak thin a ni tih a sawi. Kum 1980 hnulama Mizorama sawrkarna chelhtuten hemi ang hian sum hi an puk thin tih sawiin, tun sawrkarin loan a lak chu mak viau anga ngaih tur a ni lo tih a sawi.
“Theih nise, tuna kan lak aia tam pawh hi lak kan duh a, mah se, India sawrkarin a phal chin ang bak a lak theih loh. Kan dinhmun min zirchian sak zel hnu ah state tinin sum hi kan puk a, chutihrualin centre min phalsak ang zat kher hi kan la chuang lo; loh theih lohah chuan kan la ngam chuang lo,” a ti.
State lian chuan cheng vaibelchhe sing tel an puk a, tunah phei chuan vaibelchhe nuai ba kai te pawh an awm, tiin, a ba tlem bera sawi Sikkim aia Mizoram bat tamna chu vbch. 9 chauh a ni tih Zoramthanga hian a sawi. Mi thenkhatin kan state sum ba, a mihring chet zat anga chhuta, mi pakhatin chuti zat kan ba, an tih thin chu, thudik ziktluak loa, sum batna thangah kan la awk loa, centre-in a vil pui reng avangin chutianga luh mai theih a ni lo tih a sawi.
Covid vanga Mizoramin sum a dawn tur cheng vaibelchhe 2500 chuang a hmuh loh lai a, Covid len laia sum tam tak hmuh a nih tho thu sawi a ni thin pawh thudik chanve a ni, tiin, hrilen laia state sum hmuh tam tak chu hmanna tur ruahman lawk sa, pawhlen theih loh a tam a, sum harsatna kan neih meka kan mamawh ber chu, ruahman lawk sa ni lo, duh duhnaa hman theih – untied fund neih tam a ni tih a sawi a. Hemi ah hian state-in sum a hmu tam lo tih a sawi.
Hrilen avanga sawrkar laipuiin sum a hren tak zawng hi hmuh ni se, tuna sum lakchhuah theih loh leh harsatna nia sawi tam takah hian kan harsa dawn lo niin chief minister hian a sawi a. Sawrkarin chhiah a tih pun loh avangin, mipui nghawng si loa sum renchemna tur leh sum hmuh belhna tur ruahman chu an thupui leh an hmathlir lian ber a ni tih a sawi bawk.
Duh ang anga supplementary demand hmang anga inpuhna pawh a diklo tih a sawi a. Aseembly House-a member-ten an pass pui ni lo, hmundang atanga sum hmuh belh leh sum ruahman sa siamrem leh ngai thin chu hetah hian dah niin, supplementary demand-a pass belh ngai thin chu a tlangpuiin a lawmawm lam a ni zel tih a sawi a ni.
State budget zirchiannaah hian Finance additional secretary Ramchuana chuan budget ruangawm din dan, a kalhmang hrang hrang leh a behbawma hriat tur tul te sawiin, zawhna chhan a ni bawk.