CESSATIONIST LEH PATHIAN THU

Rev Dr Ramengliana

Mizote hi Pathian Thu hriatnaa kan that viau rual hian tam tak chu kan thlen chin hi a tawngchham leh thin. Intihthaih theih tak a la ni. Nuam kan tih zawng hian, a dik leh dik loh, a rintlak leh tlak loh, tih lam aiin min hruai nasain a lang thei bawk a. Pragmatism hian min kaihruai nasa hle a, chu chu kan thatpui nia kan hriat ihe lova zui mai thinna hi a ni a. Hmannia Cessationist tih tawngkam ka han hmang te khan thenkhat chu a tiphawklek deuh niin a lang a. Han sawi chhunzawmna remchang tak min peah ngaiin tu nge Pathian Thu, Bible hi ngaisang tak tak tih hi i han chhut chhunzawm lawk tawh ang.
Cessationist te hian Bible hi an dah sang ber zawk a ni lo maw?
Thil nuihzatthlak deuh rawn awm ta chu Cessationist ka ni tih vangin kan han inhmu ‘liberal’ ta nghal mai thei hi a ni. Bible rinawmzia defend nasatu BB Warfield, Charles Spurgeon, John MacArthur Jr., te ang kan hmu liberal tihna a ni mai dawn si ale! Eng pawh ni se, anmahni hi ka tehfung an nih kher pawh a ngai chuang lo va, keima hriatthiam ve chinah chuan Cessationism kan tih pui hi Bible thuchah hnawlna lam aiin a thu ken zawng zawng ngaihhlutna leh ngaih pawimawhna ni zawkin a lang. Cessationist-te chuan ngaih pawimawh tur kan ngaih pawimawh hmasak a, ngaihthah zawk tur kan ngaihthah thiam hi an duh a ni.
Evangelical Cessationist te chuan Biblea inziak thilmakte hi an ringhlel ngai lo va. Heta inziak tawh bak buaipui leh hmuh tum phet leh rawngbawlna hmanrua atana beisei taka neih hi buaina zakhua mai mai, Bible-in zirtirnain a tum lem loh ni zawkin an hria a ni. Biblein a sawite hi ngaih pawimawh tur a ni a, Pathian Thu hlawm, Pathian Lehkhabuin a sawi tawh chu belh a ngai tawh lem lo, tih hi an sawi dan a ni. Bible hian a puang kim vek tawh a, a tawk tawh (Sufficiency of Scripture) an ti a ni. Kan thlarau mamawh zawng zawng a chuang tawh e, an tihna a ni ber. Chutianga pawmtu nge thilmak dangin la belh hram hram se titu chu ‘liberal’ hnaih zawk ang le? A tu chuan nge Bible hi dah sang zawk ta le? Tunge Bible duh tawk lo va, tu nge lungawipui zo?
Pathian thu kan hriat tum dan bihchian a tul em le?
Tunlaiah hian thenkhatin thlaraua san leh thlarau hmanraw nih nan chaw ngheia an tawngtai tam leh rei lamte an sawi thin a ni awm e. Thenkhat chuan hetianga ti peih apiangte hi Pathianin a hmang nasain Pathian Thu an dawng tha a, Thlarau pawhin thiltihtheihna a pe nasa niin an ngai. Hetiang ngaihdante hi a va han ‘liberal’ tek tek em! A hlauhawma a mihring hle bawk! Zofa ringtu tam tak, thahnemngai em em site hi kan ‘liberal’ zo ta em ni zawk? Pathian mi hman tih leh Thlarau Thianghlim atanga thiltihtheihna te hi kan hlawh chhuah chi a ni lo. Intihhrehawm leh chawi nghei tama dawng emaw kan intih chuan Bible zirtirna ni lovin Hindu sakhaw zirtirna kan hnaih zawk fe a nih ka ring.
Mihring hriat phak china Pathianin a hman nasat ber nia ngaih theih Evangelist Billy Graham kha a lar vanglaiin journalist pakhatin, “Nang aia thu sawi thiam hi an tam a, enga ti nge heti taka Pathianin a hman nasat che le?” tiin a zawt ngat mai a. Ani chuan ihe lovin, “Ka hre hauh lo, van ka thlen hunah chuan Pathian hnena ka zawh hmasak ber tur a ni ang,” a ti hmiah mai a ni. Pathian Thu Bible kan neih tawh hi chuan Pathian thu chu chaw nghei, meditation, inkhurbinga hriat a ni tawh lo va. Bible chhiar leh zira hriat tur a ni tawh zawk. Chaw ngheia tawngtai te, fianrialte chu a pawimawh reng. Mahse, Bible thu kan hriat fiah nan leh keimahni kan inngaihtlawma, kan mihrinna a ral theih nan a ni zawk. Thlaraua milian nih tuma beih tur ni lovin, kan tetzia kan hriat theih nan a ni zawk e.
Cessationist te hian Thlarau nun dik an promote zawk a ni lo maw?
Evangelical Cessationist-te hi chuan Pathian Thlarau Thianghlim hnathawh dik tak chan a, hmuh an tum thin. An hmu ngei thin bawk. Mahse an thunun theih loh thil a ni tih an pawm a, thilmak danglam tak phei chu ringtu thlarau nun san leh san loh hriltu atan an ngai lem lo. Chutiang thil chuan an thlarau nun a khawih danglam em em lo va, Thlarau Rah zawk chu an nuna a lan chhuah theih nan mahni inphata Isua hnung zui an tum hram hram zawk a ni. Chu chu a ‘biblical’ a, chu chu a ropui berah an ngai. Nunphung pangngaia Pathian thuawihna aia ropui leh thlarau hi an hre thiam lo a ni ber awm e.
Pentecostal-Charismatic lam hi chuan nunphung pangngai piah lama thlarau hnathawh hmuh deuh ut mai hi an ngai pawimawhin an ngaihsan ber a ni a. Nuam an ti bawk. Chutiang thilah chuan Pathian ropuina hmuh an tum phet a, nunphung pangngai hi an tan a ‘boring’ (ninawm) thin. Prosperity Theology (Health and Wealth Gospel) tuipuitu te phei chuan taksa damna leh tihdam theihna te phei chu an ‘exploit’ a. Anmahni tanghma haina hmanrua atan hman an tum ni zawkin a lang. Tih theih loh tawp tur tih theiha sawi te, ni miah lo nia sawi tlat te hi ringtute intihbuaina tur niin a lang thei lo a ni. Pathian thu atanga lo tih phet te phei chu Pathian tih lohna nasa tak niin a hriat zawk a ni.
Hetiang thil sawi fo mai hi thil nuam tak a ni lem lo a. Mi rilru hliam theihna leh Pathian Ram tana kan thahnemngaihpui tak takte nena insutna a lo ni thin a, thil hrehawm angreng tak a ni. Chutih laiin loh theih loh a nih chin a awm bawk si. Buh tak leh si chu thliar hran hun a awm a ngai ang hian a titu pawh awm a ngai ve bawk. Kan Kristian nun leh rawngbawlnaah hian hmanraw tha nia lang apiang uma Pragmatist kan ni dawn nge ‘thutak ban leh innghahna’ nia Biblein a sawi Kohhran hian ‘thlarau leh thutakin’ rawng kan bawl dawn? Pragmatism leh Bible zirtirna hi a inkalh tlat tih erawh hre thung ila.